“Të gjitha ekipet frikësohen të luajnë në Santiago Bernabeu”, Ronaldo flet me emocione për Real Madridin

Cristiano Ronaldo ka qenë sot (e premte) i pranishëm në ceremoninë e ndarjes së çmimeve nga Globe Soccer Awards që është mbajtur në Dubai. 

Ylli portugez u rikthye që të flas sërish për Real Madridin dhe trajnerin e tyre Carlo Ancelotti, për të cilin tha se nuk është rastësi që ka fituar kaq shumë trofe. 

“Menaxhimi i yjeve është shumë i rëndësishëm dhe Carlo Ancelotti është njëri prej më të mirëve në këtë punë. Nuk është rastësi që ai është kaq shumë i suksesshëm”. 

“Real Madridi është para Barcelonës dhe ata po thonë se kanë një sezon të keq? Nuk i kuptoj këto gjëra”. 

“Ndjesia që të dhuron Bernabeu është ndryshe. Të gjitha skuadrat kanë frikë që të luajnë atje. Ky është një fakt”, ka thënë Ronaldo fillimisht. 

“Nëse duhet që të vini bast për një skuadër në Ligën e Kampionëve, ju e bëni këtë për Real Madridin”. 

Lexo po ashtu "Cili tha se Messi është më i miri?" - Ronaldo i reagon djaloshit në videon me Mr Beast

“Bernabeu është i frikshëm për kundërshtarët, ju kurrë nuk duhet ta konsideroni Real Madridin të vdekur”. 

Ish-legjenda e Real Madridit gjithashtu foli edhe për Superligën e Arabisë, ku e përsëriti sërish se ajo është më e mira se sa Ligue 1 sipas tij. 

“Superliga e Arabisë është më e mirë se sa Ligue 1, natyrisht. Tentoni të vraponi në 38, 39, 40 gradë dhe do ta shihni. Franca ka vetëm PSG-në, pjesa tjetër është e mbaruar”, përfundoi ai./Telegrafi/