Tahiri i AAK-së: Gjendja me energjinë elektrike po keqësohet, veprimet e qeverisë janë simbolike

Shefi i Grupit Parlamentar të AAK-së, Besnik Tahiri ka folur për situatën energjetike në vend.

Ai ka thënë se që gjashtë herë radhazi janë marrë masa emergjente për këtë sektor.

“Kërkesa për gjendje të jashtëzakonshme, marrje të masave emergjente tash e 6 herë na tregon disa tregues: E para ka të bëjë se a është duke dashur Qeveria që 20 muaj ta mbajë gjendjen e jashtëzakonshme dhe 6 herë radhazi me marr masa emergjente për këtë sektor. Si është e mundur që në komisionin përkatës, qeveria përmes ministrisë të mos jap asnjë analizë se cilat janë benifitet që Kuvendi i ka marrë në raport me gjendjen emergjente në raport me energjinë elektrike”, ka thënë Tahiri.

Ai ka shtuar se gjendja me energjinë elektrike po keqësohet  dhe veprimet e qeverisë janë simbolike.

Tahiri më pas përmendi edhe situatën në veri, për çka e kritikoi kryeministrin Albin Kurti që nuk ka ardhur të raportoj në Kuvend.

“Si deputetë nuk jemi serioz, nuk jemi tu e trajtuar gjendjen që është sot shumë e jashtëzakonshme në vend me asnjë seriozitet. Për ne si grup parlamentar nevoja për masa emergjente urgjente është që të merret për sigurinë në vend, për situatën e krijuar në veri. A ish dashtë kryeministri sot me ardh me raportu para këtij Kuvendi për situatën. Jam i habitur me këtë qasje. Gjendja nuk ka qenë më keqe tash e 20 vjet në Kosovë. Ku është partneriteti me SHBA-të”, tha Tahiri. /Telegrafi/