Supozitorët e Lule basanit për hemorroidet – si dhe për cilën fazë përdoren

Hemorroidet e brendshme shfaqen brenda rektumit, ndërsa hemorroidet e jashtme nën lëkurë rreth anusit dhe çdo problem trajtohet në mënyra të ndryshme

Supozitorët e Lule basanit (lat.: Hypericum perforatum) rekomandohen më shpesh për hemorroidet, janë preparate të forta medicinale që futen në rektum, ku treten dhe përthithen përmes mukozës së rektumit.

Supozitorët janë më së shpeshti një kombinim i vajit ose kremit dhe ilaçeve, ndërsa në rastin e supozitorëve, përbërësi kryesor i supozitorit është vaji i Lule basanit.

Çfarë janë hemorroidet?

Hemorroidet janë enët e gjakut të fryra në anus dhe rreth tij dhe rektumit. Ato mund të zmadhohen dhe irritohen, duke shkaktuar dhimbje dhe shqetësim.

Hemorroidet e brendshme ndodhin brenda rektumit, ndërsa hemorroidet e jashtme ndodhin nën lëkurë rreth anusit, transmeton Telegrafi.

Hemorroidet e jashtme shpesh shkaktojnë kruajtje, irritim dhe dhimbje, por edhe hemorroidet e brendshme mund të shkaktojnë dhimbje. Megjithatë, ato mund të mos jenë aq irrituese apo të dhimbshme sa ato të jashtme, sepse indi që mbështjell rektumin e brendshëm ka më pak mbaresa nervore.

Për cilat faza të hemorroideve përdoren supozitorët e Lule basanit?

Nëse hemorroidet janë në fazën fillestare dhe shkaktojnë dhimbje të lehta, mjeku zakonisht sugjeron supozitorë.

Disa supozitorë për hemorroidet mund të lehtësojnë ënjtjen dhe djegien. Të tjerët mund të lehtësojnë kapsllëkun që mund t’i përkeqësojë hemorroidet. Bimët mjekësore, si Lule basani, Hamamelis virginiana dhe vaji i kokosit, mund të lehtësojnë problemin e shkaktuar nga hemorroidet. Megjithatë, këta supozitorë nuk përmbajnë barna aktive për trajtimin e ënjtjes dhe dhimbjes.

Kremrat dhe pomadat zakonisht aplikohen në hemorroidet e jashtme për lehtësim të përkohshëm dhe mund të lehtësojnë djegien, kruajtjen ose dhimbjen e lehtë. Supozitorët janë më të mirë për hemorroidet e brendshme. Ilaçi absorbohet në indin rektal dhe mund të lehtësojë dhimbjen e shkaktuar nga hemorroidet. Ndonjëherë simptomat e shkaktuara nga hemorroidet e jashtme gjithashtu mund të zhduken.

Kur funksionojnë supozitorët?

Supozitorët janë të destinuara për hemorroidet e brendshme dhe të jashtme. Ato funksionojnë duke ndihmuar epitelizimin e mukozës anale dhe duke vepruar si lubrifikant. Përveç vajit të Lule basanit, supozitorët mund të përmbajnë edhe përbërës të tjerë natyralë, për shembull dyll blete.

Supozitorët zakonisht përdoren dy deri në katër herë në ditë për një javë. Ato janë më efektive nëse futen në rektum pas lëvizjes së zorrëve në mënyrë që efekti të zgjasë më gjatë. Kremrat dhe pomadat për përdorim të jashtëm mund të përdoren kur nevojitet lehtësim. Megjithatë, lehtësimi nuk është aq afatgjatë, sepse supozitorët treten më ngadalë, duke lëshuar ilaçe për një periudhë më të gjatë kohore.

Gjakderdhja e vogël është e zakonshme me hemorroidet. Nëse vëreni sasi të vogla gjaku të kuq të ndezur në letër higjienike ose jashtëqitje, kjo është normale. Përdorimi i supozitorëve është ende i sigurt. Megjithatë, nëse jashtëqitja është e zezë ose vëreni sasi të mëdha gjaku në jashtëqitje, duhet të shkoni te mjeku.

Si përdoren supozitorët?

Supozitorët mund t’i fusni në rektum vetë ose me ndihmën e një familjari, derisa të mësoheni me të. Për të filluar, do t’ju duhet një supozitor dhe aplikatori që vjen me të. Për futjen më të lehtë të supozitorit, mund të përdoret një xhel lubrifikues (por jo vazelinë pasi mund të parandalojë shkrirjen e supozitorit) për të lehtësuar procesin.

Së pari kontrolloni nëse supozitori është i fortë. Nëse ilaçi është shumë i butë/i ngrohtë, duhet ta ftohni në frigorifer për disa minuta përpara se ta fusni, dhe efekti ftohës do të sigurojë lehtësim shtesë. Përpara procesit të futjes, do të ishte mirë që të zbrazni zorrët, sepse sa më gjatë të qëndrojë ilaçi në vend pa u zhvendosë, aq më mirë është. /Telegrafi/