Stoltenberg: NATO ndërmjetëson bisedimet për t’i parandaluar incidentet e reja mes Greqisë dhe Turqisë

Greqia dhe Turqia kanë rënë dakord rreth negociatave teknike në NATO “për të parandaluar incidente të reja në Mesdheun lindor”, tha sot Sekretari i Përgjithshëm i Aleancës, Jens Stoltenberg.

Në ditët e fundit, Ankaraja dhe Athina kanë matur forcat në zonë, duke rritur tensionet, ndërsa një numër incidentesh ngritën shqetësime në lidhje me zhvillimin e krizës.

Të dy vendet kanë mosmarrëveshje për ndarjen e rezervave të gazit nënujor të zbuluara në vitet e fundit, transmeton Telegrafi.

Following my discussions with Greek & Turkish leaders, the two Allies have agreed to enter into technical talks at #NATO to establish deconfliction mechanisms and reduce the risk of incidents & accidents in the #EastMed. https://t.co/Kc70MlNPzY

— Jens Stoltenberg (@jensstoltenberg) September 3, 2020

“Pas bisedimeve të mia me udhëheqësit grekë dhe turq, të dy aleatët ranë dakord mbi negociatat teknike në NATO për të përcaktuar mekanizmat ushtarake të qetësimit dhe për të zvogëluar rrezikun e incidenteve në Mesdheun lindor,” shkroi Stoltenberg në Twitter.

“Greqia dhe Turqia janë aleatë të vlefshëm dhe NATO është një platformë e rëndësishme e konsultimeve për të gjitha çështjet në lidhje me sigurinë e përbashkët”, shtoi ai.

Të Mërkurën, Sekretari i Shtetit i SHBA-së, Mike Pompeo kërkoi që Athina dhe Ankaraja “të ulin tensionet” dhe të ndalojnë përshkallëzimin në Mesdheun lindor. /Telegrafi/