LAJMI I FUNDIT:

Stoltenberg: Dhuna në Kosovë i vë në rrezik aspiratat euroatlantike

Stoltenberg: Dhuna në Kosovë i vë në rrezik aspiratat euroatlantike

Shefi i NATO-s, Jens Stoltenberg, ka deklaruar se aleanca veri-atlantike do të shtojë 700 trupa në Kosovë, në kuadër të KFOR-it.

Në një konferencë për media me kryeministrin e Norvegjisë, Jonas Gahr Store, Stoltenberg ka thënë se “Prishtina ashtu edhe Beogradi duhet të ndërmarrin hapa konkretë për të de-përshkallëzuar situatën”.

“Ne kemi vendosur të dislokojmë 700 trupa shtesë nga Forca Operacionale Rezervë për Ballkanin Perëndimor. Po ashtu kemi vendosur në gatishmëri një batalion shtesë të forcave rezervë, në mënyrë që ato të mund të dislokohen nëse është e nevojshme. Këta janë hapa të matur për të siguruar që KFOR-i ka forcat dhe aftësitë që i nevojiten për të përmbushur mandatin e tij. Dhuna e zmbraps Kosovën dhe gjithë rajonin dhe i vë në rrezik aspiratat euroatlantike. Si Prishtina ashtu edhe Beogradi duhet të ndërmarrin hapa konkretë për të de-përshkallëzuar situatën. Të përmbahen nga sjelljet e mëtejshme të papërgjegjshme dhe të angazhohen në dialogun e lehtësuar nga BE-ja, i cili është e vetmja rrugë drejt paqes së qëndrueshme”, ka thënë Stoltenberg, transmeton KP.

Ai ka deklaruar se sulmet e paprovokuara kundër trupave të KFOR-it në veri të Kosovës janë të papranueshme dhe duhet të ndalen.

“Ne dënojmë fuqishëm sulmet e paprovokuara kundër trupave të KFOR-it në veri të Kosovës, të cilat çuan në plagosjen e 30 paqeruajtësve. Sulme të tilla janë të papranueshme dhe duhet të ndalen. KFOR-i, forcat e NATO-s, do të ndërmarrin të gjitha veprimet e nevojshme për të ruajtur një mjedis të sigurt dhe të qetë për të gjithë qytetarët në Kosovë. Dhe ne do të vazhdojmë të veprojmë në mënyrë të paanshme, në përputhje me mandatin tonë të Kombeve të Bashkuara”, ka thënë ai.