Sot nis shpërndarja e librave falas në Shqipëri, Rama: Konkretizim i mbështetjes së qeverisë

Këtë të premte nis në të gjitha shkollat fillore në Shqipëri shpërndarja e teksteve mësimore falas.

Kryeministri Edi Rama me anë të një postimi në Facebook ka kujtuar se librat do të shpërndahen falas për të gjithë nxënësit e shkollave 9-vjeçare, ndërsa për klasat e para, të dyta dhe të treta librat do të shpërndahen të rinj, e jo më të përdorur siç kanë qenë në vitet më parë.

Kjo sipas kryeministrit është konkretizim i mbështetjes së qeverisë shqiptare për të pajisur nxënësit me burime cilësore të dijes.

“Mirmëngjes! Dhe me nisjen e shpërndarjes së teksteve FALAS për të gjithë nxënësit e shkollave publike 9-vjeçare ku përveç klasave të para, edhe ato të dyta e të treta do t’i kenë librat falas me një përdorim si dhe për nxënësit e 16 kategorive të veçanta në arsimin e mesëm të lartë, një konkretizim tashmë tradicional i mbështetjes së qeverisë shqiptare për të pajisur nxënësit me burime cilësore të dijes, ju uroj një ditë të mbarë”, shkruan Rama në Facebook. /Telegrafi/