Si po e financojnë kompanitë gjermane dezinformimin në Serbi?

Në shumë medie serbe, ka një ndjenjë masive anti-BE dhe pro-ruse. Vlerësimi i organizatës joqeveritare serbe CRTA tregon se për ironi kompanitë perëndimore financojnë këto media përmes reklamave, përfshirë edhe ato gjermane, shkruan tagesschau.

“Rusia u detyrua të futet në luftë”, pasi në “Ukrainë ishte kryer spastrim etnik, dhe perëndimi kishte filluar luftën në Ukrainë”. Jo më pak se prapa kësaj qëndron presidenti serb Aleksandar Vuçiq, i cili në masë të madhe ka krijuar këtë peizazh mediak në Serbi, që është nën kontrollin e tij, transmeton Telegrafi.

Çfarë ka “shpërthyese” lidhur me këtë? Sipas organizatës joqeveritare serbe CRTA, shumë medie në Serbi financohen në masë të madhe nga reklamat e kompanive perëndimore.

Nga vlerësimi i reklamave në televizionet nacionale dhe gazetat ditore gjatë vitit të kaluar, ka ardhur në përfundim se rreth 63 për qind e tyre vijnë nga kompanitë në BE, SHBA apo Zvicër.

“Pa paratë e kompanive perëndimore, makineria propaganduese e Serbisë nuk do të ishte e mundur”, thotë Rasa Nedelkov, drejtor i programit në CRTA.

Pothuajse gati 10 për qind e reklamave vijnë nga kompanitë gjermane

Kompanitë gjermane janë gjithashtu të përfshira në masë të madhe, dhe sipas Nedelkovit janë “lojtarët kryesor në tregun serb të reklamave”, ku sipas tij ato përbëjnë deri në 10 për qind të reklamave

Sipas CRTA-s, kompanitë private dhe ato shtetërore serbe së bashku përbëjnë 36 për qind. Më shumë se 10 kompani gjermane vendosën reklama në vlerë prej më shumë se një milion euro në mediat e Serbisë gjatë vitit të kaluar.

LIDL shpenzoi më së shumti para, ku ky grup vendosi reklama në vlerë prej 54 milionë euro. Ndiqet nga Beiersdorf me 10.3 milionë euro. Glov që është në pronësi të Delivery Hero me pesë milionë euro dhe Berlin Chemie AG me 3.7 milionë euro. Gjithashtu Dr. Theis, Bayer dhe Metro vendosën reklama në vlerë mbi një milion euro. Reklamat u vendosën në medie të ndryshme.

“Sipas analizës tonë, më shumë se gjysma e reklamave të LIDL kanë dalë në televizionet Pink dhe Happy, që të dyja janë famëkeqe për propagandën pro-ruse dhe raportimin e tyre joprofesional dhe joetik”, thotë Nedelkov.

Sipas Nielsen Televizion Audience Measurement, televizioni Pink është televizioni komercial më i shikuar në Serbi. Sipas vlerësimit të CRTA, të gjitha kompanitë tjera gjermane vendosën reklama në televizionin serb Pink.

Imazhi i keq i BE-së 

Televizioni Pink së bashku me televizionin Happy konsiderohen si mediet më ekstreme në Serbi. Për shembull, sa i përket këndvështrimit të luftës në Ukrainë, janë narrativat ruse ato që po shpërndahen.

Për shembull, dezinformimi rus për pretendimet për “denazifikim” pranohet, ose krimet e luftës të kryera nga ushtarët rusë në Bucha paraqiten si manipulim. Gjithashtu NATO-n e fajësojnë për luftën.

Sikur kjo të mos mjaftonte, mediat i japin një imazh të keq BE-së. Gjithashtu thuhet se nuk ka liri të shprehjes në Bashkimin Evropian. Një postim tjetër thotë se “zëri i arsyes” në BE ishte ai i kryeministrit hungarez Viktor Orban. Janë edhe Shtetet e Bashkuara që vazhdimisht denigrohen.

Pas tërmeteve shkatërruese që goditën Turqinë dhe Sirinë, Shtetet e Bashkuara ishin akuzuar se kishin shkaktuar këtë katastrofë. Edhe mediat tjera në Serbi shpërndajnë këndvështrime të ngjashme siç janë televizione Prva dhe B92 apo gazetat Informer dhe Vecernje Novosti. Edhe këtu, disa kompani gjermane kanë vendosur reklama në vlerë prej mbi një milion euro. /Telegrafi/