Shkolla “Faik Konica” del me njoftim zyrtar, pas raportimeve për abuzim seksual ndaj nxënëses

Shkolla Fillore e Mesme e Ulët “Faik Konica” në Prishtinë ka dalë me një njoftim pas raportimit për abuzim seksual ndaj nxënëses së klasës së parë të kësaj shkolle.

Drejtoria e Shkollës, Këshilli i Prindërve dhe Këshilli Drejtues i Shkollës, përmes një reagimi në Facebook, kanë bërë të ditur se drejtoria e kësaj shkolle ka ndërmarrë të gjitha masat si brenda edhe jashtë shkollës, duke njoftuar prindërit e të dy palëve, Policinë e Komunitetit, Qendrën për Punë Sociale dhe organe të tjera kompetente, dhe të gjithë personat që kanë mundur të preken në mënyrë indirekte nga rasti.

“Ne si Drejtori e Shkollës, Këshill i Prindërve dhe Këshill Drejtues distancohemi nga të gjitha raportimet e pavërteta dhe linqime të fëmijëve, si dhe bëjmë ftesë nga të gjithë prindërit dhe më gjerë, që të përmbahen nga komentet që mund të rëndojnë gjendjen e fëmijëve”, thuhet në reagim.

Reagimi i plotë i Shkollës Fillore e Mesme e Ulët “Faik Konica” në Prishtinë:

“Reagim i Drejtorisë së Shkollës, Këshillit të Prindërve dhe Këshillit Drejtues të Shkollës.

Sot në takim me menaxhmentin e shkollës, prindërit e klasave të ndryshme, anëtarët e Këshillit të Prindërve, Këshillin Drejtues dhe Drejtorinë e Shkollës kemi diskutuar në detaje për rastin që ka ndodhur në oborrin e shkollës në ditë fundjave/vikendi.

Fillimisht duam të ju konfirmojmë se Drejtoria e Shkollës, që nga pranimi i videos (dt. 24 prill) nga burime të paidentifikuara për rastin në fjalë, ka ndërmarrë të gjitha masat si brenda edhe jashtë shkollës, duke njoftuar prindërit e të dy palëve, Policinë e Komunitetit, Qendrën për Punë Sociale dhe organe të tjera kompetente, dhe të gjithë personat që kanë mundur të preken në mënyrë indirekte nga rasti.

Jemi njoftuar se të gjitha këto institucione janë marrë me rastin prej momentit të njoftimit (dt. 24 prill), dhe të njëjtët kanë udhëzuar Drejtorinë që rasti të mbahet në konfidencialitet të plotë në mënyrë që të ruhet mirëqenia e fëmijëve. Përtej kësaj, jemi njoftuar se rasti është trajtuar dhe është duke u trajtuar edhe nga psikologu i shkollës dhe një psikolog i jashtëm.

Ne si Drejtori e Shkollës, Këshill i Prindërve dhe Këshill Drejtues distancohemi nga të gjitha raportimet e pavërteta dhe linqime të fëmijëve, si dhe bëjmë ftesë nga të gjithë prindërit dhe më gjerë, që të përmbahen nga komentet që mund të rëndojnë gjendjen e fëmijëve.

Kërkojmë nga institucionet e rendit të ndërmarrin veprime ndaj të gjitha atyre që paraqesin rrezik ndaj fëmijëve, si përmes shpërndarjes se inqizimit/videos, ashtu dhe përmes abuzimit verbal.

Gjithashtu, lusim që të gjithë prindërit dhe nxënësit e shkollës, të keni bashkëpunim me kryetarët e klasave, Drejtorinë e Shkollës, Këshillin e Prindërve dhe Këshillin Drejtues për trajtimin e rastit në mënyrë që fëmijët të mos ndihen të pasigurtë, prindërit të kuptojnë që rasti është trajtuar në detaje dhe mosdiskutimi i rastit në publik është bërë me qëllim të ruajtes së gjendjes fizike e mendore të fëmijëve, sipas udhëzimeve të pranuara dhe nga policia, dhe jo heshtja siç është aluduar në media.

Ju faleminderit për mirëkuptimin dhe mbështetjen tuaj të vazhdueshme në të mirë të fëmijëve tanë.

Drejtoria e Shkollës, Këshilli i Prindërve dhe Këshilli Drejtues i Shkollës”, thuhet në reagim.

Edhe kryetari i Komunës së Prishtinës, Shpend Ahmeti, ka reaguar sot pas raportimit në media për një rast të abuzimit seksual ndaj një nxënseje të mitur në një shkollë të Prishtinës.

Ahmeti, nëpërmjet një postimi në Facebook, ka thënë se pas shpërndarjes së videos, udhëheqësia e shkollës në Prishtinë ka njoftuar Këshillin drejtues të shkollës, Këshillin e Prindërve, Qendrën për Punë Sociale dhe Policinë e Komunitetit.

Kolektivi për Mendim dhe Veprim Feminist, nesër (e hënë) në orën 12:00 do të mbajë protestë pranë Ministrisë së Ministrisë së Arsimit, Shkencës, Teknologjisë dhe Inovacionit. Protesta do të mbahet pas raportimit të një rasti të sulmit seksual ndaj një nxënëse të klasës së parë në Prishtinë.

Edhe Policia e Kosovës ka reaguar dje  pas publikimit të një videoje në disa portale, sipas së cilës pretendohet se ka ndodhur një rast i abuzimit seksual në mes të nxënësve në oborrin e një shkolle në kryeqytet.

Në njoftimin e Policisë thuhet se nga zyrtarët e shkollës Policia ka pranuar një informacion me ndjeshmëri, i cili është trajtuar në koordinim me drejtuesit e shkollës, zyrtarët e Qendrës për punë dhe mirëqenie Sociale si dhe Prokurorin e shtetit. /Telegrafi/