Shefi i mbrojtjes i Izraelit zbulon “planin në tri faza për të mposhtur Hamasin”

Ministri izraelit i Mbrojtjes, Yoav Gallant detajoi planet e vendit për të mposhtur Hamasin në një takim të komitetit të mbrojtjes të premten, por nuk dha asnjë të dhënë se si planifikon të mbikëqyrë rajonin kur të ndalojnë luftimet.

Duke folur në një takim të Komitetit të Punëve të Jashtme dhe Mbrojtjes të Knesset në Tel Aviv, Gallant paraqiti strategjinë e Izraelit për të mposhtur grupin përgjegjës për sulmin e befasishëm të 7 tetorit që vrau më shumë se 1300 izraelitë, përcjell Telegrafi.

Ai u tha anëtarëve të komitetit se lufta do të shpaloset në tri faza të dallueshme.

Faza e parë, e cila është duke u zhvilluar, do të përfshijë një fushatë ushtarake të sulmeve ajrore dhe më vonë manovra tokësore “me qëllim të shkatërrimit të operativëve dhe dëmtimit të infrastrukturës për të mposhtur dhe shkatërruar Hamasin”, tha Gallant.

Lexo po ashtu “Ne nuk do ta lëmë tokën tonë”, thotë presidenti palestinez në samitin e paqes në Kajro

Faza e dytë do të përfshijë ende luftime, por me një intensitet të reduktuar pasi trupat e zhvendosin fokusin e tyre për të “eliminuar zonat e rezistencës” që mbeten në rajon.

Së fundi, Gallant tha se ndërsa lufta hyn në fazën e tretë, Izraeli do të punojë për të krijuar një “regjim të ri sigurie” në Gaza.

Veçanërisht, kjo fazë përfundimtare do të përfshijë “heqjen e përgjegjësisë së Izraelit për jetën e përditshme në Rripin e Gazës”, e cila do të sjellë “një realitet të ri sigurie për qytetarët e Izraelit” dhe ata që jetojnë afër Gazës.

Megjithatë, shkruan New York Post, në fjalët e tij mungonte ndonjë tregues se çfarë do të thotë Izraeli të heqë çdo përgjegjësi për Gazën dhe 2.2 milionë banorët e saj, territor i cili varet tërësisht nga Izraeli për shërbimet thelbësore si uji dhe energjia elektrike. /Telegrafi/