Serbia ia cakton një muaj paraburgim ish-policit të Njësisë Speciale, avokati Koci jep detaje

Pas dy ditësh ndalim nga autoritetet serbe, Arbnor Spahiut, ish-pjesëtar i Njësisë Speciale Operative (NJSO) të Policisë së Kosovës, i është caktuar masa e paraburgimit prej një muaji nga Gjykata Themelore në Serbi.

Lajmi është konfirmuar nga avokati i tij, Arianit Koci, i cili e ka cilësuar këtë vendim si të padrejtë, të motivuar politikisht dhe të pabazuar në prova apo fakte konkrete.

“Së paku një reagim të qartë dhe publik. Sepse asnjë qytetar i këtij vendi nuk guxon të lihet vetëm, kur përsekutohet padrejtësisht”, ka deklaruar Koci, duke kërkuar angazhim të drejtpërdrejtë të institucioneve të Kosovës – jo vetëm të Ministrisë së Punëve të Jashtme dhe Zyrës Ndërlidhëse në Beograd – por edhe të vetë krerëve të shtetit, Kryeministrit dhe Presidentes.

Ai ka njoftuar se nesër do të udhëtojë drejt Suboticës, për të ndjekur nga afër zhvillimet lidhur me rastin.

Spahiu u arrestua nga autoritetet serbe në pikën kufitare ndërmjet Hungarisë dhe Serbisë, gjatë kthimit të tij nga Austria me autobus.

Sipas avokatit, ai është marrë në pyetje në lidhje me sulmin e armatosur në Banjskë të Zveçanit, që ndodhi në shtator të vitit 2023.

Më herët gjatë ditës së sotme, Ministria e Punëve të Jashtme dhe Diasporës e Kosovës konfirmoi për Radion Evropa e Lirë se Spahiu pritet të dalë para gjykatës në Kikindë.

Autoritetet serbe kanë ndaluar disa herë shtetas të Kosovës nën dyshime për krime lufte. Zyrtarët në Prishtinë i kanë cilësuar këto arrestime si arbitrare dhe politikisht të motivuara.

Kosova dhe Serbia, që nga viti 2013, kanë një marrëveshje për ndihmë të ndërsjellë juridike, të ndërmjetësuar nga Bashkimi Evropian, por bashkëpunimi në fushën e krimeve të luftës ka qenë pothuajse inekzistent./Telegrafi/