Serbët që braktisën institucionet e Kosovës nënshkruajnë kontrata – do të marrin rroga nga Serbia

Menjëherë pasi serbët kanë braktisur institucionet e Kosovës, presidenti serb Aleksandar Vuçiq, ishte zotuar se Serbia do t’i mbështesë financiarisht serbët që dhanë dorëheqje.

Zotim i Vuçiqit ka filluar të zbatohet sot, kur në katër komuna në veri të Kosovës ka filluar nënshkrimi i kontratave ndërmjet shtetit të Serbisë, përmes të ashtuquajturës Zyrë për Kosovën dhe serbëve të larguar nga institucionet e Kosovës.

“Në këtë mënyrë po plotësohet premtimi i bërë nga presidenti i Serbisë, Aleksandar Vuçiq, qytetarëve tanë në Kosovë të larguar nga institucionet, se shteti do të kujdeset për secilën prej tyre dhe se askush nuk do të mbetet pa përkrahje të shtetit [serb]”, thuhet në komunikatën e lëshuar nga Zyra për Kosovën në Qeverinë e Serbisë.

Sipas komunikatës, me këto kontrata, serbët që janë larguar nga institucionet do t’i rregullojnë të gjitha obligimet nga marrëdhëniet punë-juridike, pensionale, sigurime shëndetësore etj.

“Pagesa e këtyre përfitimeve do të nisë rregullisht dhe qytetarët do t’i kenë paratë në llogaritë e tyre tashmë në dhjetor. Prandaj, të gjitha të ardhurat që kanë marrë në sistemin e Kosovës tani do të vijnë nga shteti i tyre i Serbisë”, thuhet në komunikatë, transmeton Telegrafi.

“Në këtë mënyrë shteti dërgoi një mesazh të qartë se populli ynë, që përfaqëson mburojën e qëndrimit dhe mbijetesës në Kosovë, do të mbrohet dhe do të kujdeset dhe do të ketë shtetin e vet prapa vetes”, thuhet në komunikatë. /Telegrafi/