Sancho jep dritën e gjelbër për transferimin tek gjiganti italian, por ka një pengesë

La Gazzetta dello Sport raporton se Jadon Sancho është i hapur që t’i bashkohet Juventusit këtë verë, por ‘Bianconerët’ janë duke punuar për një marrëveshje huazimi teksa Manchester United dëshiron shitjen përfundimtare të tij prej 50 milionë eurosh.

E përditshmja italiane shton se sulmuesi anglez tashmë ishte pajtuar për një kalim në Turin në formë huazimi gjatë afatit kalimtar të janarit, por ish-trajneri Massimiliano Allegri e refuzoi mundësinë për të nënshkruar me të pasi Sancho nuk përshtatej me sistemin e tij 3-5-2.

Pas një periudhe gjashtë mujore në formë huazimi tek Borussia Dortmund, Sancho nuk e ka ndryshuar qëndrimin e tij për një transferim tek Juventusi dhe do ta pranonte me kënaqësi transferimin në Itali.

Sipas Gazzettas, Sancho nuk është në planet e ‘Djajve të Kuq’ për sezonin e ardhshëm, por klubi anglez dëshiron të paktën 40-50 milionë euro për ta lënë të lirë.

Juventusi në anën tjetër po shtyn për një marrëveshje huazimi. Në këtë rast, Man United do të duhej gjithashtu të paguante një pjesë të pagës së Sanchos (8.5 milionë euro në vit).

Siç shton tutje raporti, Sancho i është ofruar edhe disa klubeve të tjera, duke përfshirë Borussia Dortmundin, Man Cityn dhe Arsenalin, por asnjëra nga to nuk janë të gatshme që t’i plotësojnë kërkesat financiare të Manchester United.

Lexo po ashtu Alarmohen gjigantët evropianë nga çmimi që Man United i ka caktuar Jadon Sanchos

Një tjetër opsion është që të shkëmbehen Sancho dhe Federico Chiesa, me italianin që ka vetëm një vit të mbetur në kontratën e tij dhe ende nuk ka gjetur gjuhën e përbashkët me ‘Zonjën e Vjetër’ për zgjatjen e saj.

Juventusi do të takohet së shpejti me agjentin e tij, Fali Ramadani, për të diskutuar rreth të ardhmes së tij.

Mason Greenwood, Karim Adeyemi dhe Xavi Simons janë gjithashtu në radarin e Juventusi, sipas Gazzettas, por ky i fundit nuk është një prioritet për Thiago Mottan./Telegrafi/