Sadiq Khan zgjidhet kryebashkiak i Londrës për një mandat të dytë

Sadiq Khan është rizgjedhur kryetar i Bashkisë së Londrës, në një garë më të ngushtë se sa pritej.

Khan, i cili u bë myslimani i parë që kryesoi një kryeqytet të madh perëndimor pas fitores së tij në 2016, fitoi 55.2 për qind të votave krahasuar me 44.8 për qind për Shaun Bailey, kandidati nga partia Konservatore në pushtet.

Pjesëmarrja ishte 42 për qind, më e ulët se në zgjedhjet e mëparshme në 2016.

“Jam thellësisht i përulur nga besimi që londinezët më kanë dhënë për të vazhduar drejtimin e qytetit më të madh në tokë”, tha Khan, i cili përqendroi fushatën e tij në krijimin e vendeve të punës në qytetin me nëntë milionë banorë.

Siç thuhet më tej, 50-vjeçari tha se mandati i tij i dytë do të përqendrohej në “ndërtimin e urave midis komuniteteve të ndryshme” dhe midis bashkisë së qytetit dhe qeverisë.

Ai tha se donte “të siguronte që Londra mund të luante rolin e saj në një rimëkëmbje kombëtare” dhe të “ndërtonte një të ardhme më të gjelbër dhe më të barabartë” për kryeqytetin e Mbretërisë së Bashkuar.

Ndryshe, Khan njihet edhe si një kritik i zëshëm i Brexit dhe i kryeministrave konservatorë të njëpasnjëshëm, duke përfshirë Boris Johnson, paraardhësi i tij si kryebashkiak – si dhe për një grindje me ish-presidentin e SHBA-së, Donald Trump. /Telegrafi/