Rusia ngrin llogaritë bankare të Finlandës dhe Danimarkës

Llogaritë bankare të Finlandës dhe Danimarkës në Rusi janë ngrirë, duke bërë që ambasadat e tyre të bëjnë pagesa në para, kanë thënë zyrtarë nga të dy vendet.

Ministri i Jashtëm finlandez Pekka Haavisto tha se llogaritë bankare kishin pushuar së punuari më 27 prill, ndërsa ministria e jashtme e Danimarkës tha se llogaritë e saj bankare ishin ngrirë që nga vera e kaluar, shkruan Sky News, përcjell Telegrafi.

“Llogaritë e ambasadave finlandeze janë ngrirë në Rusi dhe për momentin ato nuk mund të përdoren”, citohet të ketë thënë Haavisto, duke shtuar se ambasada dhe konsullata e saj në Rusi kishin përdorur rezerva parash për të paguar faturat.

Ministria e Jashtme daneze tha se kufizimet e vendosura nga autoritetet ruse nënkuptonin se kartat bankare të ambasadës së saj ishin bllokuar.

“Rritja e kërkesave për dokumentacion përpara të gjitha pagesave do të thotë konkretisht se ambasada ka kohë që paguan pagat për punonjësit dhe paguan faturat me para në dorë”, tha ministria.

Banka Qendrore e Rusisë nuk ka komentuar rreth një çështjeje të tillë. /Telegrafi/