Rregullat e rrepta anti-COVID në Australi e lanë aktorin Jamie Dornan në pamundësi që të kthehej në Angli për vdekjen e babait

Aktori Jamie Dornan ka zbuluar se ishte izoluar në karantinë, në një hotel në Australi kur mori lajmin se babai i tij, Jim, kishte vdekur nga COVID-19 pasi ishte shtruar në spital për një operacion në gju.

Dornan, 39 vjeç, i cili ka famë nga filma si “Fifty Shades of Grey” dhe drama kriminale “The Fall”, e gjeti veten në anën tjetër të botës me katër ditë karantinim kur babai i tij vdiq marsin e kaluar dhe nuk ishte në gjendje të kthehej në vendin e tij të lindjes, në Irlanda e Veriut, shkruan The Guardian.

Dornanit iu kërkua të izolohej në Australi përpara xhirimit të dramës së BBC-së, “The Tourist”, në të cilën ai luan rolin e një burri që nuk e ka idenë se kush është dhe pse ka mbetur i izoluar në pjesën e jashtme të Australisë.

Shifrat e publikuara nga BBC të premten treguan se “The Tourist” është lansimi i tretë më i suksesshëm i dramës në iPlayer, pasi është shikuar më shumë se 18 milionë herë.

Humbja e babait të tij e bëri vitin 2021 “vitin më të keq … dhe më të vështirë” të jetës së tij, tha Dornan për tabloidin britanik The Sun.

“Ka qenë një kohë brutale për shumë arsye dhe për shumë njerëz. Ne të gjithë thjesht po përpiqemi ta nxjerrim atë dhe të dalim nga ana tjetër – dhe shpresojmë që të shpëtojmë kokën tonë”, tha ai.

Babai i Dornan, Jim, ishte një obstetër dhe gjinekolog i njohur në spitalin ‘Royal Victoria’ në Belfast dhe thuhet se ishte krenar që djali i tij po luan në të njëjtin film me fituesin e ‘Oscar’-it, Sir Kenneth Branagh, dhe Dame Judi Dench.

Komedi-drama e cila përshkruan jetën e një djali të ri dhe familjes së tij të klasës punëtore, duke u kapur nga Problemet e Irlandës së Veriut në fund të viteve 1960, mori shtatë nominime për çmimet “Golden Globe” dhe fitoi një prej tyre – atë për “skenarin më të mirë”. Ai do të shfaqet në kinematë në Mbretërinë e Bashkuar në fund të janarit.

Dornan, i cili jeton në Gloucestershire me gruan e tij, Amelia Warner, 39 vjeçe, dhe tri vajzat e tyre të vogla, tha se skenari i Belfast-it rezonoi me të në një nivel personal dhe ende e quan veten një “burrë të Belfastit”, megjithëse u largua nga qyteti kur ishte 20 vjeç.

Në film, Dornan luan rolin e një babai që ka ardhur në Angli për të punuar me shpresën se familja e tij mund t’i bashkohet atje dhe të lërë pas tensionet midis protestantëve dhe katolikëve në Belfast.

“[Belfast] është në shtëpi. Ne ndoshta ndihemi sikur kjo është një gjë e veçantë, një ‘burrë nga Belfasti’ dhe mendoj se të gjithë e dimë se çfarë do të thotë kjo”, tha Dornan.

“Nëse jeni nga Belfasti, pavarësisht se në cilën epokë jeni rritur, keni kaluar diçka. Ju keni kaluar një vështirësi të caktuar dhe jeni testuar në shumë faza të ndryshme të jetës suaj”, ka thënë aktori.

Jim mbështeti ndjekjen e djalit të tij për një karrierë prej aktori dhe e ndihmoi atë të përballonte humbjen e nënës së tij, Lorna, nga kanceri i pankreasit kur ishte 16 vjeç, duke i thënë të birit: “Mos lejo që kjo tragjedi të jetë gjëja që të përcakton”.

“Unë i jam nënshtruar herët dhimbjeve në jetën time dhe tani më janë bërë shumë dhimbje dhe humbje”, tha Dornan. /Telegrafi/