RMV: Zgjerohet hetimi i institucioneve inspektuese në Onkologji

Edhe pas heqjes së drejtorit medicinal në Onkologji, nuk janë çrrënjosur skemat e dyshimta për shitjen e terapive si dhe dhënien e tyre në mënyrë selektive. Duke u nisur nga denoncimet e reja të pacientëve se po vazhdojnë keqpërdorimet me terapitë e shtrenjta të kancerit, edhe Inspektorati Shtetëror Sanitar Shëndetësor ndërhyn në Klinikën e Onkologjisë. Nga Ministria e Shëndetësisë thonë se hetimi është zgjeruar, pasi dy paciente kanë denoncuar se terapitë e rregullta të tyre iu kanë dhënë dikujt tjetër.

“Ne zhvilluam një takim me drejtoreshën e Inspektoratit Shtetëror Sanitar Shëndetësor dhe është konstatuar se ka një lloj thyerje të drejtës për trajtim në kohë të terapisë së caktuar për pacientët. Kjo ka qenë nismë për ne si MSH, duke pasur parasysh se edhe ju keni trajtuar këtë temë, bënë inicim për të zgjeruar hetimin tonë në Klinikën e Onkologjisë”, tha Bekim Sali, Ministër i Shëndetësisë.

Përderisa kryeministri Kovaçevski iu bën thirrje të gjithëve të denoncojnë korrupsionin, si një barrë që po tangon Maqedoninë edhe procesin e negociatave me BE-në, për skandalin e Onkologjisë thotë se kanë ndërmarr hap duke e detyruar të dorëhiqet drejtori Nino Vasev, i cili vazhdon të punoj në klinikë.

“Të gjitha dëshmitë, të cilat i janë të nevojshme prokurorisë janë në Klinikën e Onkologjisë dhe mund ti tërheqin. Mesa di unë drejtori medicinal është dorëhequr dhe atje ka drejtor të ri. Prokuroria ka rast të hapur. Por detaje për rastin hetimor unë me të vërtetë nuk mund të di, nga që tek unë nuk ka arritur asnjë ankesë ose çfarëdolloj kërkese e dorëzuar në formë të dokumentuar”, u shpreh Dimitar Kovaçevski, Kryeministër.

Sipas raporteve revizore të Fondit Shëndetësor të bëra në këtë Klinikë, në tre vitet e fundit borxhet janë shtuar vazhdimisht, kurse nga ana tjetër janë vërejtur mungesë të terapive për pacientët, të cilët e kanë jetike kundër kancerit. Për këtë arsye, fondi është dashur ti jap klinikës edhe mbi 5 milion euro shtesë për të mbuluar hendekun, para të cilat dyshohet se janë vjedhur përmes terapive. Ndërkohë, revizion në këtë klinikë po bën edhe Enti shtetëror i revizionit, rezultatet e të cilave priten në fund të janarit. Por, Prokuroria për krim të organizuar dhe korrupsion, s’ka ndërmarrë asgjë deri më tani. Thotë se është në pritje të palëve të denoncojnë rastin me dëshmi nga që nuk i mjaftojnë zërat në opinion./Alsat.mk