Federico Chiesa i ka falënderuar të gjithë për mesazhet mbështetëse dhe i ka siguruar tifozët se do të kthehet në fushë sa më shpejt që është e mundur.
24-vjeçari nuk do të luajë deri në fund të sezonit si pasojë e lëndimit të ligamentit kryqëzues të përparmë (ACL) që e pësoi në ndeshjen e të dielës mbrëma kundër Romës,
Anësori italian iu nënshtrua ekzaminimeve mjekësore mëngjesin e të hënës në J Medical dhe Bianconerët konfirmuan se do t’i nënshtrohet ndërhyrjes kirurgjike në ditët në vijim.
Bashkëlojtarët, kolegët dhe tifozët kanë reaguar përmes rrjeteve sociale duke i ofruar mbështetje dhe duke i uruar shërim të shpejtë futbollistit.
“Faleminderit shumë për të gjitha mesazhet mbështetëse. Shihemi së shpejti në fushë”, është reagimi i Chiesas në rrjetet sociale.
Lëndimi i tij nënkupton se do të mungojë edhe në ndeshjet e barazhit kundër Maqedonisë së Veriut në muajin mars. /Telegrafi/
