Ramos mesazh Real Madridit: Nuk ka asnjë të re për rinovimin, mund të luaj edhe pesë vite

Sergio Ramos është rikthyer në stërvitje me Real Madridin, pasi u rikuperua nga një dëmtim në gju, ndërsa 34-vjeçari është i etur të paraqitet mirë në këto muajt e ardhshëm.

E ardhmja e kapitenit të Real Madrid është në diskutim, me kontratën e tij që skadon më 30 qershor, por ai është përqendruar vetëm në atë se si po shkojnë gjërat në fushë.

Së fundmi janë publikuar disa pjesë nga dokumentari ‘The Legend of Sergio Ramos’,që përbëhet nga gjashtë episode, ku Ramos shprehu dëshirën e tij për të ngritur edhe disa trofe me Los Blancos.

“Më në fund jam përsëri me ekipin. Tani vjen faza më e rëndësishme [e sezonit] dhe unë do të doja të ndihmoja me paraqitje të shkëlqyera”.

“Shpresojmë që ne të mund të fitojmë një trofe të madh dhe t’ua kushtojmë tifozëve”, ka thënë Ramos.

Kur u pyet për të ardhmen e tij, qendërmbrojtësi i Real Madrid zbuloi se nuk ka asgjë të re.

“Do të doja të mund të thosha diçka, por gjithçka mbetet e njëjtë”.

“Gjithçka për të cilën po mendoj është të kthehem dhe të përfundoj sezonin në mënyrën më të mirë të mundshme. Nuk ka asnjë lajm për rinovimin tim, do të doja të mund të [thosha diçka].

“Jam i qetë dhe po mendoj vetëm të luaj dhe të fitoj një trofe”, nënvizoi ai.

Ramos ka besim dhe mendon se mund të vazhdojë të luajë në këtë nivel edhe për pesë vjet të tjera.

“Ju nuk mund t’i kënaqni të gjithë, por ka një gjë që nuk mund ta fshini: gjithçka që keni fituar”.

“E vetmja gjë që më shqetëson është se ata e dinë që unë jam një burrë i vërtetë, se kam lënë shpirtin tim për logon e Madridit”.

“Unë mund të luaj edhe pesë vjet në nivelin më të lartë. Nëse dëmtimet nuk janë shumë të këqija, mentaliteti im do të më ndihmojë”, ka deklaruar ai. /Telegrafi/