Ukraina dhe Rusia shkëmbyen qindra të burgosur të shtunën në fazën e dytë të një shkëmbimi masiv midis vendeve.
Të dyja palët liruan 307 ushtarakë, një ditë pasi 390 luftëtarë dhe civilë u liruan në fazën e parë të premten, transmeton Telegrafi.
"Midis atyre që u kthyen sot janë ushtarë nga ushtria jonë, shërbimi shtetëror kufitar dhe Garda Kombëtare e Ukrainës", tha presidenti ukrainas Volodymyr Zelensky në kanalin e tij zyrtar në Telegram.
Shumica e ushtarëve ukrainas të liruar u morën robër në rajonin e Donetskut, disa që në vitin 2022, tha udhëheqësi ukrainas në një video-adresim shtesë.
Ai shtoi se të tjerë u kapën në territoret e rajoneve Kherson, Zaporizhzhia, Kharkiv dhe Luhansk.
Një total prej 697 ukrainasësh janë kthyer në shtëpi gjatë dy ditëve të fundit, me një shkëmbim të tretë të të burgosurve që pritet të zhvillohet të dielën, gjë që do ta bënte atë shkëmbimin më të madh në tre vjet konflikt.
Kiev dhe Moska ranë dakord të shkëmbejnë 1,000 të burgosur nga secila palë gjatë bisedimeve në Stamboll javën e kaluar. Kjo shënon një moment të rrallë bashkëpunimi midis dy kombeve, të cilat kanë dështuar shumë herë të arrijnë një marrëveshje armëpushimi.
Megjithatë, shkëmbimi nuk i ndaloi luftimet. Të shtunën, një sulm i madh rus me dron dhe raketa ndaj Kievit, plagosi të paktën 15 persona dhe dëmtoi ndërtesa banimi dhe një qendër tregtare.
"Ukraina është gati për çdo formë diplomacie që jep rezultate reale. Ne jemi gati për të gjitha hapat që mund të garantojnë siguri të vërtetë. Është Rusia që nuk është gati për asgjë. Java e ardhshme duhet të jetë një kohë për veprim që synon rritjen e presionit ndaj Rusisë - me fjalë të tjera, që synon sigurimin e paqes", tha Zelensky. /Telegrafi/
