Publikohen pamjet kur Mihal Kokëdhima në Himarë terrorizon turistët spanjollë mbi xhamin e furgonit në ecje

Është siguruar një video ekskluzive të momentit kur Mihal Kokëdhima, pronari i një restoranti në ‘Porto Palermo’ të Himarës, në një mënyrë krejtësisht të çmendur, i është hedhur me trup furgonit ku udhëtonin turistët dhe teksa automjeti është në ecje ai godet me grushte xhamin e përparmë duke e thyer atë.

Turistët brenda furgonit janë të tmerruar. Automjeti drejtohet nga një shofer shqiptar, edhe pasagjeri i parë dhe një tjetër udhëtarë janë shqiptarë, ndërsa në furgon dëgjohen të flasin të frikësuar edhe turistët spanjollë.

Ata kanë njoftuar policinë, ndërsa nga sa dëgjohet në videon ekskluzive, ata janë nisur nga ‘Porto Palermo’, ndodhen pranë Qeparosë, dhe do të shkonin deri në Sarandë në stacionin e policisë për ta dorëzuar aty.

Lexo po ashtu Përfaqësuesi i familjes spanjolle pas incidentit në Himarë: Ne do të kthehemi përsëri në Shqipëri për ta njohur më mirë vendin

Por rruga bëhet e vështirë. Turistët dhe shqiptarët i kërkojnë të zbresë, edhe ai vet kërkon që makina të ndalojë pasi nuk ka më forcë të qëndrojë mbi xham teksa furgoni është në ecje. Por edhe pasi ndalon dhe zbret nga xhami i përparmë i automjetit, Mihal Kokëdhima kërkon të hapë derën e furgonit dhe t’i sulmojë sërish turistët, raporton Report TV.

Në atë moment në rrugë shihet teksa kalon edhe një furgon policie.

Lexo po ashtu Turistët rrëfejnë përvojat e tyre në restorantin e pronarit që sulmoi turistët spanjollë: "Njeri i keq, pronar kriminel"

Ndërkohë, nga sa dëgjohet nga çfarë thonë shqiptarët, turistët spanjollë nuk donin të hanin ushqimin e porositur në restorantin e Mihal Kokëdhimës në Porto Palermo për shkak të shërbimit të keq, por pronari i është sulur duke i ofenduar dhe i ka ndjekur edhe pasi ata janë larguar me furgon, duke ju hedhur mbi xham.

Shqiptarët dëgjohen të thonë se pas tyre është edhe një tjetër automjet që po i ndjek, ndërsa thonë se kishin edhe armë të ftohta. Mihal Kokëdhima tashmë është i arrestuar nga policia.