Pse çdo i dyti gjerman është i trashë?

Tepër të trashë janë mbi 70 për qind e gjermanëve të cilët kanë të kryer vetëm shkollën fillore. Në mesin e atyre që kanë përfunduar shkollën e mesme janë 35 për qind, e në mesin e atyre me shkollim të lartë, janë gati 10 për qind.

Çdo i dyti gjerman është tepër i trashë derisa, pesha përtej mase e trupit, është e lidhur ngushtë me gjendjen sociale dhe nivelin e arsimimit. Kështu del nga studimi kombëtar mbi ushqimin të cilin e ka publikuar Ministria gjermane e shëndetësisë.

"Sa më i ulët niveli i arsimimit, aq më i madh është rreziku nga trashja", ka thënë ministri gjerman i shëndetësisë, Horst Seehofer, duke paraqitur rezultate e këtij hulumtimi në Berlin.

Nga studimi del që, të trashë janë mbi 70 për qind e gjermanëve që kanë të kryer vetëm shkollën fillore, me shkollë të mesme, gjermanë të trashë janë gjysmë më pak, derisa me shkollim të lartë janë diç më pak se 10 për qind, në moshën mbi 60 vjeçare.

"Sa më i ulët niveli i arsimimit me këtë shtohet edhe rreziku nga trashja", ka thënë Seehofer.

Studimi ka dëshmuar që ndaj trashjes janë të prirë qytetarët të cilët jetojnë në bashkëshortësi, apo në ndonjë lloj të bashkimit martesor, derisa tek ata që jetojnë vetëm rreziku prej trashjes është më i vogël.

Ky hulumtim i vitit të kaluar, i kryer me më shumë se 20.000 të anketuar mes moshave 14 e 80 vjeç, gjithashtu dëshmon që gjermanët nga veriu janë dukshëm më të trashë sesa ata nga jugu, përkundër asaj që mënyrat tradicionale të ushqimit të veriut janë me më shumë peshk dhe më të përshtatshme sesa ato nga jugu, ku ushqimi është i pasuruar me produkte të yndyrshme mishi.

Drejtori i organizatës për mbrojtjen e konsumatorëve Foodwatch Thielo Bode beson shumë që fajtor për sjelljet çdo ditë e më të këqija të ushqimit të gjermanëve, të cilat ndikojnë në shpërndarjen masive të sëmundjeve si diabeti, është fajtore industria e ushqimit.

"Industria e ushqimit po na bën të marrë, po na mashtron dhe pjesërisht po na helmon", ka thënë Bode në bisedë për gazetën Westdeutsche Allgemeine Zeitung. Ai ka kërkuar nga politikat gjermane që të bëjnë “presion” në industrinë e ushqimit që artikujt në të ardhmen të shënohen sipas nivelit të rrezikut për shëndetin.