Protestojnë studentët e Universitetit të Prizrenit, kundërshtojnë emërimin e Rektorit (Video)

Studentët e Universitetit të Prizrenit bojkotuan mësimin në shenjë proteste për emërim e rektorit të ri. Sipas tyre përzgjedhja është bërë kundër rregullave ligjore, dhe në baza partiake. Ndërsa paralajmërojnë të hyjnë në grevë urie, në rast se MASHT nuk përfillë kërkesat e tyre.

Një grup i studentëve të Universitetit të Prizrenit kanë bojkotuar mësimin dhe kanë mbyllur me dry dyert e Kampusit, duke kundërshtuar kështu emërimin e rektorit të ri.

“Nuk jemi material zgjedhor. Nuk jemi të njoftuar si është bërë zgjedhja e Rektorit, pos që është dalë më një njoftim që nga ky moment Ushtruesi  i Rektorit është zgjedhur”, tha Fatlind Tredhaku, kryetar i Këshillit të Studentëve.

Anëtari i senatit të Univeristetit të Prizrenit, Artan Nimani, thotë se përzgjedhja e ushtruesit të detyrës së rektorit, është bërë pa pëlqimin e senatit.

“Një grup i anëtarëve të Këshillit nga MASHT-i, në mbrëmje jashtë orarit kanë mbajtur një takim, dhe në mënyrë të paligjshme kanë mbajtur një takim dhe në mënyrë të paligjshme kanë nxjerrë një vendim që kanë caktuar ushtrues detyre të rektorit, një kandidat që ka ndalesë nga gjykata për të ushtruar atë funksion. Ne këna kërkuar takimin e senatit, dhe ai na ka dhënë të drejtë, sepse zgjedhja e rektorit është ilegale dhe nuk do të përfillet”, tha Artan Nimani.

E profesorë të Universitetit, duke dashur të mbesin anonimë, deklaruan se përzgjedhja e bërë, është marrëveshje politike.

Këtë e mohon ushtruesi i detyrës së rektorit, Ismet Temaj.

“Përzgjedhja e Ushtruesit të Rektorit është bërë të premten në kampusin e Universitetit të Prizrenit. Është marrë vendim që të shfuqizohet vendimi paraprak dhe të zgjedhet ushtruesi i detyrës”, tha Ismet Temaj.

Studentët paralajmëruan të hyjnë në grevë urie, në rast se kërkesat e tyre nuk merren parasysh. /RTV Dukagjini/Telegrafi/