Infermieri Enlirat Duraku, tash e 16 ditë është në grevë urie, ndërsa ka bërë të ditur nga sot nuk do të pijë as ujë.

Infermieri Duraku i cili së fundmi është prekur me coronavirus ka shkruar se Qeveria nuk ka plotësuar kërkesat e infermierëve, që të rritet pagesa e ndërrime të natës nga 18 në 36 euro, transmeton Telegrafi.

“Sot është dita e 16-të e Grevës së Urisë, mirëpo nuk reflektuat.Nga sot as ujë as lëngje nuk do përdori, e ju fleni të qetë, mbani pozitat.1 Të rritet pagesa e ndërrimeve të natës nga 18€ në 36€,2. Të paguhen orët shtesë dhe puna gjatë vikendeve, 3. Të paguhet rrezikshmëria”, ka shkruar ai në një postim në Facebook.

Sindikata e Infermierëve më herët ka kërkuar që të paguhet puna e tyre gjatë fundjavës, festave dhe orët shtesë, ndërkaq pagesat për ndërrimet e natës kërkojnë të rriten 100 për qind, nga 18 euro sa janë në 36 euro, si dhe të paguhet rrezikshmëria në punë.

“Gjatë kësaj pandemie e dëshmuam vetën përmes punës, angazhimit, vullnetit, sakrificës dhe gatishmërisë. Sa e sa nga infermierët nuk i takuan me muaj të tërë më të dashurit e tyre, fëmijët e tyre, prindërit e tyre, vëllezërit dhe motrat e tyre, vetëm që ju të jeni të sigurt, që ky virus mos të shpërndahet, ndërsa të prekurve u shërbyen kujdes maksimal! Sa nga infermierët u infektuan nga ky virus në krye të detyrës duke rrezikuar shëndetin e tyre dhe ndoshta edhe jetën ndërsa JU duartrokitët për përkushtimin dhe punën e tyre! Ne u kujdesëm për shtetin. Është koha që shteti të kujdeset për ne”, thuhej në komunikatën e Sindikatës së Infermierëve të Kosovës. /Telegrafi/