Pretendimet e Bamieh ndaj Ilir Tolajt mund të mos zbardhen kurrë, rasti është vjetruar

Në një konferencë të gjatë të shtunën, ish-prokurorja e EULEX-it, Maria Bamieh ka folur përsëri publikisht për të bëmat që ajo thotë se i kreu misioni i Bashkimit Evropian për sundim të ligjit në Kosovë. Ajo përsëri ka përmendur rastin e ish-sekretarit të Përgjithshëm të Ministrisë së Shëndetësisë, Ilir Tolaj, për të cilën tha se kishte prova të mjaftueshme të kishte dënim. Mirëpo, rasti i Tolajt ka tashmë disa muaj që ka arritur parashkrimin absolut dhe ndaj tij, përkundër deklarimeve të Bamieh, nuk ka asnjë mundësi që të hapet rasti.

Tetë vjet nga përvoja e saj rreth dy dekada si prokurore, Maria Bamieh i kaloi në Kosovë.

Për vitet e kaluara këtu, ajo foli gjerë e gjatë të shtunën, në këtë konferencë për media.

Bamieh hodhi përsëri akuza të rënda për korrupsion në EULEX, madje ritheksoi dy raste, ku sipas saj kishte prova të mjaftueshme për të pasur dënime.

“Nga këto përgjime unë dëgjova se gjyqtari francez po takohej me ndërmjetësuesit e z. Ilir Tolaj. Ata ishin takuar në Villa Gërmia me gjyqtarin Francesco Flori dhe prokuroren Jaroslava Novotna dhe unë u shkova këtyre përgjimeve në detaje. Ato të gjitha ishin të rëndësishme”, ka thënë Bamieh.

Mirëpo, këto pretendime të Bamieh për rastin Tolaj, duket se nuk do të zbardhen asnjëherë.

Rasti i ish-sekretarit të përgjithshëm të ministrisë së Shëndetësisë, tashmë ka mbërritur parashkrimin absolut.

“Gjykata Supreme nuk ka kompetencë, por asnjë Gjykatë as tek ne, mirëpo as në vendet e rajonit, por edhe më gjerë në Evropë nuk ka mundësi që të veproj në rastet kur kemi parashkrim absolut të ndjekjes penale. Do të thotë me një farë forme këtu procedura ka përfunduar”, është shprehur Agim Maliqi, Gjyqtar në Gjykatën Supreme

Në raste të tilla të parashkrimit, gjyqtari i Gjykatës Supreme, Agim Maliqi, thotë se mund të merret vetëm një veprim.

“Nëse një afat i parashkrimit është për pesë vite, apo dhjetë vite dhe nëse nuk ka vepruar gjyqtari brenda këtyre dhjetë viteve, atëherë mund të iniciohet ndonjë procedurë disiplinore eventualisht, nëse ajo lëndë është parashkru si shkak i neglizhencës në punë të atij gjyqtari”, ka theksuar Maliqi.

Vet Tolaj, të cilit iu përmend shpesh emri nga Bamieh, thotë se këto janë deklarime të përsëritura.

Ai ka drejtuar akuza të rënda drejt saj.

“Këto deklarime të saj, shumë herë të përsëritura, tregojnë se kemi të bëjmë me një persona që mendërisht është jo stabil, kurse profesionalisht është e dështuar. Në këtë gjendje, ajo gënjen opinionin public duke dashur që të paraqesë kinse e gjithë bota është kundër saj”, ka thënë Tolaj.

Në konferencën e saj, Bamieh ka akuzuar për korrupsion edhe disa prokurorë e gjyqtarë të tjerë të EULEX-it.

Hulumtuesi i lartë në KDI, Vullnet Bugaqku thotë se me këto raste duhet të merret Bashkimi Evropian.

“Unë besoj se do të ishte e udhës që Bashkimi Evropian dhe organet e BE-së të nisin procedurat hetimore në rast se kanë prova që të paktën janë bërë të bazuara për çfarëdo dyshimi që këta persona kanë kryer këso veprash gjatë ushtrimit të funksionit të tyre në Republikën e Kosovës”, është shprehur Bugaqku.

Për këtë çështje si dhe për disa tema në lidhje me deklarimet e Bamies, gjatë ditës Televizionit nuk i janë përgjigjur EULEX dhe Prokuroria Speciale./RTV Dukagjii/