Prejardhje nga i njëjti rajon, karriera ‘të ngjashme’ politike, të dy ishin futbollistë – kush është Ekrem Imamoglu, njeriu që ‘po ndjek gjurmët e Erdoganit’

Kryetari i sapozgjedhur i Stambollit, Ekrem Imamoglu është shfaqur si sfiduesi kryesor i udhëheqjes së presidentit turk Recep Tajip Erdogan.

Por në një farë mënyre, ai po ndjek gjurmët e liderit turk që drejtoi qytetin në vitet 1990, thuhet në një shkrim të Reuters, përcjell Telegrafi.

Përveç që kanë udhëhequr qytetin më të madh të vendit, të dy kanë rrënjë familjare në rajonin lindor të Detit të Zi dhe karriera e tyre politike është penguar nga gjykatat e Turqisë.

Në rininë e tyre, të dy ishin gjithashtu futbollistë.

Pas arritjes së një fitoreje dhe mbajtjes së postit të tij në zgjedhjet për kryetar bashkie të së dielës, Imamoglu, 53 vjeç, është tani një president i mundshëm i ardhshëm sipas këndvështrimit të shumë analistëve, thekson më tej Reuters.

Votuesit i dërguan një mesazh direkt Erdoganit, tha Imamoglu pas zgjedhjeve. “Ata që nuk e kuptojnë mesazhin e kombit do të humbasin përfundimisht”.

Por, ndërsa ata ndajnë një aftësi të fortë për të tërhequr votuesit, ata ndryshojnë kur bëhet fjalë për politikën.

Imamoglu, një ish-biznesmen, ka thënë vetë: “idetë tona janë kryesisht të kundërta”.

Erdogan hyri në politikë me një parti islamike dhe ka riformuar shtetin laik me vizionin e tij të devotshëm që kur mori “frenat” në vitin 2002.

Në të kundërt, Imamoglu është nga Partia Popullore Republikane (CHP) sekulariste, duke u bashkuar në vitin 2008 dhe duke u bërë kryebashkiak i saj në Beylikduzu të Stambollit rreth 10 vjet më parë.

Suksesi i Imamoglu është për shkak të aftësisë së tij për të “thyer tavanin” e mbështetjes prej rreth 25% të CHP-së socialdemokrate në Turqi dhe për t’u bërë thirrje votuesve më konservatorë.

Ai në vitin 2019 i dha AK Partisë (AKP) të Erdoganit humbjen më të madhe në dy dekada dhe mposhti kandidatin e saj jo një herë, por dy herë.

Një gjykatë e anuloi fitoren e tij në mars të atij viti vetëm që ai të fitonte me një diferencë më të madhe në zgjedhjet e përsëritura në qershor.

Erdogan u rikthye për të fituar rizgjedhjen si president vitin e kaluar, pavarësisht tensioneve të përhapura ekonomike, duke sfiduar shumë sondazhe.

Por Imamoglu tani ka dhënë një goditje të re.

“Këto janë më shumë se zgjedhje për kryetar bashkie,…”, tha Imamoglu gjatë fushatës, përcjell Telegrafi.

Kritikët e Erdogan thonë se gjyqësori i Turqisë, të drejtat civile dhe liritë e shtypit janë “gërryer” nën mbikëqyrjen e tij, akuza që qeveria i mohon.

Takimi i tyre i parë

Vetë Imamoglu është përballur me probleme gjyqësore.

Pas fitores së tij në 2019, një gjykatës e dënoi atë me 2-1/2 vjet burg, duke vendosur një ndalim politik për fyerje të zyrtarëve publikë. Gjykata e Apelit ende nuk ka vendosur për rastin.

Dënimi i bëri jehonë përvojës së Erdoganit, i cili u burgos për pak kohë në 1999 për recitimin e një poezie që një gjykatë vendosi se ishte një nxitje e urrejtjes fetare.

Vitin e kaluar, një gjykatë tjetër hapi një çështje kundër Imamoglu me një akuzë për manipulim tenderash që parashikon një dënim nga tre deri në shtatë vjet.

Kritikët e Erdoganit i shohin rastet si një përpjekje për të penguar politikisht Imamoglun.

Por Erdogan dhe AKP e tij e mohojnë këtë.

Pavarësisht nga ato që ai i përshkruan si pengesa nga Ankaraja, Imamoglu tha se administrata e tij ka ofruar shërbime dhe zhvillim në Stamboll, një qytet prej 16 milionë banorësh që drejton ekonominë e Turqisë.

Metropoli është një botë larg provincës së Detit të Zi të Trabzonit, ku Imamoglu lindi në vitin 1970 dhe kaloi atë që ai e përshkruan si një fëmijëri të lumtur mes “natyrës së gjelbër të harlisur, detit të trazuar dhe rrugëve prej guri”.

Ai studioi në Universitetin e Stambollit dhe u diplomua për administrim biznesi në vitin 1994, vitin kur Erdogan u bë kryetar bashkie, përpara se të merrej me biznesin e ndërtimit të familjes së tij. Ai është i martuar dhe ka tre fëmijë.

Fitorja e së dielës ishte në kontrast me vitin 2019.

Ai u mbështet atëherë nga një aleancë opozitare që u shemb vitin e kaluar pas humbjes së përgjithshme në zgjedhje.

Ai tha se mbështetja e tij këtë herë erdhi nga “një aleancë e fortë e ndërgjegjes, e krijuar nga miliona të etur për demokraci dhe drejtësi”.

Dhe shumë analistë tani parashikojnë sukses të mëtejshëm për Imamoglun.

“(Nëse) këto zgjedhje nuk anulohen nga kundërshtimet në një farë mënyre, ai do të bëhet president në vitin 2028”, i tha Reuters para zgjedhjeve Ozer Sencar, kreu i anketuesit Metropoll.

Rivaliteti midis Imamoglu dhe Erdogan mund të nxehet në skenën kombëtare në vitet në vijim, por kryebashkiaku së fundmi kujtoi mjedisin më të zakonshëm ku ata për herë të parë u takuan.

Në mesin e viteve 1990, pasi Erdogan u bë kryetar bashkie, ai vizitoi restorantin e qofteve që i riu Imamoglu drejtonte në lagjen Gungoren të Stambollit.

“Kur ai ishte në muajt e tij të parë si kryetar bashkie, unë e prita atë”, kujton Imamoglu. “Ai ka ngrënë qofte në restorantin tim. Unë nuk ia kam marrë paratë. Ai nuk do ta paguajë atë faturë sa të jetë gjallë”. /Telegrafi/