​Posta e Kosovës lëshon në qarkullim pullat e reja postare

Posta e Kosovës ka njoftuar se ka lëshuar në qarkullim emisionin e ri të pullave postare të titulluar, “20 Vjetori i Gjysmë Maratonës – Prishtina 2020”, dedikuar njërës nga ngjarjet më të rëndësishme sportive në Kosovë, që tani më tradicionalisht mbahet në Prishtinë.

Në njoftimin e bërë nga Posta e Kosovës thuhet se kryesuesi i Bordit të Përkohshëm, Mentor Arifaj, U.D. kryeshefit ekzekutiv, Salih Morina me bashkëpunëtorë të tyre, pritën zv.ministrin e MEPTINIS, Edison Jakurti, si dhe kryetarin e Federatës së Atletikës së Kosovës, Halil Sylejmani, transmeton Telegrafi.

Më tej në njoftim thuhet se zyrtarët e lartë të Postës së Kosovës i uruan Sylejmani përvjetorin e 20-të të Gjysmë Maratonës, si e arritur e parë sportive në Kosovën e pasluftës.

“Në shenjë nderi dhe respekti për kontributin e Federatës së Atletikës së Kosovës, ata i dhuruan pullën e parë postare të punuara në bronz”, thuhet në njoftim.

Zëvendësministri i MEPTINIS, Edison Jakurti dhe kryetari i Federatës së Atletikës së Kosovës, në fjalimet e tyre falënderuan Postën e Kosovës për kontributin e kësaj të fundit në afirmimin e vlerave tona shtetërore, konkretisht të atletikës.

“Gara e parë e gjysmë maratonës së Prishtinës ishte organizuar për herë të parë më 8 prill 2001 me moton “Festo Pranverën – Vrapo për paqe dhe tolerancë”, e cila ka qenë e hapur për të gjithë të interesuarit pa dallim moshe, gjinie dhe etnie, përfshirë edhe persona me aftësi të veçanta.

Përmes kësaj pulle postare që ka vlerën nominale 1.80 €, Filatelia e Postës së Kosovës kontribuon në afirmimin e atletikës, ndërsa motivon atletët tanë në arritje sportive të Kosovës në arenën Ndërkombëtare”./Telegrafi/