Politikanët shqiptarë besojnë se Mali i Zi do të vazhdojë rrugëtimin euro-atlantik

Dy politikanët shqiptarë, Genci Nimanbegu dhe Nik Gjeloshaj kanë pohuar se e ardhmja e shtetit malazez është në Bashkimin Evropian.

Mali i Zi po mban zgjedhjet e parakohshme parlamentare pas rrëzimit të qeverisë së drejtuar nga kryeministri Dritan Abazoviq.

Nimanbegu i “Aleancës Shqiptare” ka pohuar se shqiptarët së bashku me pakicat e tjera do të jenë pjesë e qeverisë së ardhme malazeze.

“Absolutisht është e ditur se nuk ka rrugë drejt Bashkimit Evropian pa përkrahjen e pakicave autoktone. Ky do të jetë edhe çelësi i qeverisë së ardhshme. Shqiptarët së bashku me pakicat tjera do të jenë kyç në krijimin e qeverisë së ardhshme”, pohoi ai.

Ndërkohë, Gjeloshaj i “Forumi Shqiptar” ka deklaruar se Mali i Zi do të vazhdon rrugëtimin euro-atlantik.

“Unë besoj se qytetarët do të tregojnë sot se kush do t’i drejtojë në katër vitet e ardhshme. Besoj se Mali i Zi do të vazhdojë orientimin euro-atlantik”, tha ai.

Ndryshe, Abazoviq që drejton lëvizjen qytetare, Ura, ka pohuar se “Koalicioni ynë do të jetë shtylla kryesore e qeverisë së ardhshme malazeze”

“Mendoj se është herët me fol, por jam i bindur se koalicioni jonë do të jetë shtylla kryesore e qeverisë së ardhme. Çfarë nënkupton ajo, do ta shohim në javët e ardhshme”, pohoi Abazoviq.

Lexo po ashtu Abazoviq beson se do të jetë pjesë e qeverisë së ardhshme të Malit të Zi

Theksojmë se deri në orën 15:00 votuan 35.1 për qind e votuesve ose rreth 190.750 qytetarë, njoftoi Qendra për Tranzicion Demokratik (CDT).

Këto janë zgjedhjet e treta brenda nëntë muajve dhe të parat pa Milo Gjukanoviqin si lider të Partisë Demokratike të Socialistëve (DPS), i cili pas tri dekadash është tërhequr pasi në raundin e dytë të zgjedhjeve presidenciale ka pësuar humbje nga kandidati i lëvizjes, “Evropa Tani”, Jakov Millatoviq. /Telegrafi/