Pjesëmarrje e ulët e qytetarëve të Prizrenit në konsultimin publik për Planin lokal kundër dhunës në familje

Komuna e Prizrenit të premten ka organizuar konsultimin publik për përmbajtjen e Projekt-Planit Lokal të Veprimit për Mbrojtje nga Dhuna në Familje, Dhuna ndaj Grave dhe Dhuna në Barazi Gjinore 2024-2026.

Numri i qytetarëve të pranishëm në këtë takim ka qenë tejet i ulët, raporton Telegrafi.

Madje Bashkim Rakaj nga Drejtoria e Punës dhe Mirëqenies Sociale ka theksuar se është shqetësuese prezenca jo e kënaqshme e qytetarëve në këtë konsultim publik. Megjithëkëtë ai ka shtuar se palët mund ti adresojnë vërejtjet e tyre edhe në formë elektronike.

“DPMS është zotuar dhe zotohet se do ta mbështesë fuqishëm Mekanizimin koordinues lokal kundër dhunës në familje, duke tentuar që të mbështesim viktimat e dhunës në familje dhe rasteve tjera të dhunës që janë shqetësuese në komunën  tonë”, ka thënë Rakaj, duke ofruar mbështetjen e këtij dikasteri për zbatimin e Planit lokal të veprimit.

Udhëheqësja e Mekanizmit koordinues lokal kundër dhunës në familje, Kumrije Bytyqi ka bërë të ditur se ky plan mbështetet në tri fusha të veprimit, si  vetëdijesimi dhe parandalimi, pastaj mbrojtja dhe koordinimi, dhe fuqizimi ekonomik, rehabilitimi dhe riintegrimi.

“Plani lokal i veprimit kundër Dhunës në Familje për Komunën e Prizrenit, synon të punojë në parandalimin e DHF, DHG dhe DHBGJ dhe ngritjen e vetëdijes tek komuniteti për aspektet negative të këtij fenomeni; të përmirësojë sistemin e grumbullimit dhe shkëmbimit të të dhënave në mes të akterëve relevant; të fuqizojë mekanizmat për reagim sa më të shpejtë ndaj rasteve të DHF, DHG dhe DHBGJ dhe të përmirësojë koordinimin në mes anëtarëve të grupit gjatë menaxhimit të rasteve; dhe të bëjë avokim dhe monitorim të zbatimit të politikave si dhe të sugjerojë ndryshime bazuar në përvojat më të mira nga terreni”, ka deklaruar Bytyqi.

Koordinatore e Njësisë për të Drejtat e Njeriut dhe Barazi Gjinore, Mybexhele Zhuri ka theksuar se ky plan është një dokument strategjik, i cili është krijuar nga mekanizmat komunal për të trajtuar dhe parandaluar dhunën në familje në mënyrë më efektive dhe gjithëpërfshirëse, raporton Telegrafi.

Ndërkaq aktivistja e shoqërisë civile Tringa Kasemi ka kërkuar nga organet komunale që të ndahet buxheti në bazë të kostove të parapara në Planin lokal të veprimit.

Ky dokument do të jetë në konsultim publik deri më datën 15 nëntor 2024. /Telegrafi/