Pastrojeni gëlqeren në ibrik me ndihmën e këtij përbërësi

Nëse shihni njolla të bardha brenda ibrikut tuaj, ato ka shumë gjasa të jenë shkaktuar nga gëlqerorja – një substancë e ashpër që krijohet nga mineralet e ujit kur ai nxehet dhe avullon.

Me kalimin e kohës, kjo gëlqere mund të dëmtojë elementin ngrohës të ibrikut, duke bërë që ai të marrë më shumë kohë për të zier dhe përfundimisht të prishet.

Përveç kësaj, gëlqerorja mund të ndikojë edhe në shijen e çajit, duke e bërë atë të hidhur dhe duke krijuar grimca të bardha që notojnë në filxhanin tuaj – prandaj është mirë që ta pastroni ibrikun sa më shpejt të jetë e mundur.

Ka shumë mënyra për të hequr gëlqeren – përfshirë kimikatet pastruese apo uthullën me erë të fortë – por eksperti Chris Bolt nga organizata Green Citizen ndan metodën e tij të preferuar: acidi citrik.

“Ibriku juaj do të ketë më shumë grumbullim gëlqereje nëse keni ujë të fortë. Por kur i shtoni acid citrik ujit të nxehtë, ndodh magjia. Acidi fillon të sulmojë dhe të shpërbëjë gëlqeren”, pohon eksperti.

Çfarë është acidi citrik?

Edhe pse emri mund të duket i fortë, acidi citrik është një substancë natyrale që gjendet në frutat agrume si limoni dhe portokalli. Është një acid i dobët që përdoret shpesh në industrinë ushqimore për të parandaluar prishjen e ushqimeve – por gjithashtu është shumë efektiv për pastrimin e gëlqeres.

Gëlqerorja përbëhet kryesisht nga kalciumi, i cili fillon të shkumojë dhe të tretet kur bie në kontakt me acidin citrik – kështu që pastrimi bëhet pa nevojë për fërkim.

Si ta përdorni acidin citrik për të pastruar ibrikun tuaj:

Mbushni ibrikun deri në gjysmën ose aq sa të mbulojë njollat e gëlqeres;

Shtoni dy lugë çaji acid citrik;

Ziejeni ujin;

Lëreni të qëndrojë për rreth 10 minuta që acidi të ketë kohë të veprojë;

Hidhni ujin dhe shpëlajeni ibrikun me ujë të ftohtë.