Pas ndalimit, Apple investon miliona dollarë për të vazhduar shitjen e iPhone në Indonezi

Për të vazhduar shitjen e iPhone 16 në Indonezi, Apple do të investojë mbi 10 milionë dollarë në një fabrikë të re që do të prodhojë aksesorë dhe komponentë për pajisjet e tyre.

Në fund të tetorit, Indonezia ndaloi shitjen dhe përdorimin e iPhone 16 dhe Apple Watch të ri, transmeton Telegrafi.

Ndalimi është rezultat i një ligji atje që kërkon që kompanitë e huaja të ofrojnë deri në 40 përqind përmbajtje lokale për të bërë biznes në vend.

Ata mund ta arrijnë këtë përmes prodhimit vendor të produkteve të tyre dhe zhvillimit të softuerit ose krijimit të qendrave të kërkimit dhe zhvillimit.

Apple duhej të investonte pothuajse 110 milionë dollarë në qendrat indoneziane të kërkimit dhe zhvillimit, por ata nuk e përmbushën atë.

Në vend të kësaj, ata investuan rreth 95 milionë euro, prandaj Ministria e Industrisë atje bllokoi lëshimin e certifikatave për Identitetin Ndërkombëtar të Pajisjeve Mobile (IMEI) për të gjitha modelet iPhone 16 dhe serinë e 10-të të Apple Watch.

Por Apple nuk hoqi dorë nga ky rast, kështu që pjesa tjetër e parave do të investohet në një fabrikë të re në Bandung.

Siç mëson Bloomberg, investimi thuhet se do të bëhet së bashku me furnizuesin lokal të Apple, Yageo Corporation, dhe fabrika e re do t’i kushtohet prodhimit të aksesorëve dhe komponentëve për pajisjet Apple.

Apple ka paraqitur propozimin e saj në Ministrinë e Industrisë së Indonezisë dhe është në pritje të miratimit, për të hequr ndalimin e shitjes së pajisjes.

Një veprim i ngjashëm pritet së shpejti nga Google, i cili gjithashtu është i ndaluar të shesë telefona nga seria Pixel 9. /Telegrafi/