Pas dy netëve spektakolare, NGOMfest pret të shpërthejë edhe në natën e tretë (Foto)

Festivali i muzikës NGOMfest, edicioni i gjashtë i të cilit po zhvillohet në Kalanë e Prizrenit, sonte hap dyert për t’i pritur artdashësit dhe adhuruesit e muzikës elektronike.

Grupi legjendar i hiphop-it kosovar, urbaNRoots (NR) performuan gjatë natës së parë para mijëra fansave të tyre, në hapësirat e kalasë ku edhe janë të vendosura dy skena për performues. Dhjetëra këngë të grupit NR u kënduan njëzëri me publikun, duke i bërë të gjithë të përjetojnë një eksperiencë të paparë më parë në festivalet e muzikës në Kosovë.

Gjatë natës së dytë, përveç para-grupeve të shumta që performuan në ‘Main Stage’, rok-grupi kosovar Jericho bëri që i gjithë Prizreni të jehojë me këngët e tyre. Nata vazhdoi deri në mëngjesin e së shtunës në ‘Sunrise Stage’, kur Leg Off, Jehonë, Uran B. dhe Panda e shoqëruan lindjen e diellit me tingujt e muzikës së tyre.

Sonte, përveç DJ-ve lokalë dhe rajonalë, si performues kryesorë do të jenë tre DJ të Diynamic Music (Magdalena, Undercatt, Lehar), të cilët do të performojnë për gjashtë orë.

Nata do të fillojë në ora 21:00, kurse koha e përfundimit mbetet të shihet!