Pas 14 vitesh, skenaristi i “Catwoman” pranon se ndihet i turpëruar që ka punuar në atë film

Skenaristi i “Catwoman”, John Rogers, ka pranuar se ndihet i turpëruar nga filmi i bazuar në karakterin e “DC Comics” dhe thotë se kurrë nuk e ka shikuar nga fillimi deri në fund.

Filmi i vitit 2004 me Halle Berryn në rolin kryesor kishte dështuar në ‘box office’ duke përfituar vetëm 82 milionë dollarë, ndërsa për realizmin e tij ishin shpenzuar 100 milionë dollarë.

Po ashtu, asokohe ishte nominuar për shtatë Mjedra të Arta (çmime që u ndahen filmave më të këqij të vitit).

Ndërsa u shpall fitues në kategoritë për filmin më të keq, aktoren më të keqe, regjisorin më të keq dhe skenarin më të keq.

Rogers ishte njëri nga tre skenaristët e filmit (së bashku me John Brancato dhe Michael Ferris) dhe tash e ka kritikuar publikisht atë.

“Si njëri nga skenaristët e ‘Catwoman’, besoj se kam autoritetin të them se ishte një film pa lidhje i hedhur nga studioja në fundin e një cikli të atij stili dhe nuk kishte aspak lidhje kulturore, qoftë para ose prapa kamerës. Ishte një vepër e keqe. Ndjehem i turpëruar”.

“Me duhet të shtoj se asnjëherë nuk e kam shikuar filmin nga fillimi deri në fund. Nuk kam qenë as në premierë…”, ka thënë skenaristi. /Telegrafi/