Paralajmërim tjetër nga vendet gjeografikisht më afër Rusisë: Putini “do të kërkojë më shumë tokë” nëse nuk ndalet në Ukrainë

Presidentja moldave ka paralajmëruar se Rusia po shton përsëri përpjekjet për të destabilizuar vendin e saj.

Madje, sipas Maia Sandu, e cila po fliste pas nënshkrimit të një marrëveshjeje për mbrojtjen dhe bashkëpunimin me Francën, Vladimir Putin do të kërkonte të merrte më shumë tokë nëse nuk ndalet në Ukrainë.

“Nëse agresori nuk ndalet, ai do të vazhdojë, dhe vija e frontit do të vazhdojë të lëvizë më afër. Më afër nesh. Më afër jush”, citohet të ketë thënë ajo, përcjell Telegrafi.

Lexo po ashtu Dy ekspertë ekonomikë shpjegojnë pse Rusia nuk po e fiton luftën në Ukrainë

“Prandaj Evropa duhet të paraqesë një front të bashkuar. Agresioni duhet të zmbrapset nga një forcë e fuqishme”.

Ndryshe, vendet gjeografikisht më afër Rusisë i kanë shtuar paralajmërimet e tyre muajt e fundit, nga frika se një dështim për të shtyrë forcat e Moskës në Ukrainë mund të kërcënojë kufijtë e tyre.

Ndërkohë bëhet e ditur se presidenti ukrainas do të jetë nesër në Turqi për bisedime me homologun e tij Recep Tajip Erdogan.

Të dy udhëheqësit do të diskutojnë rrjedhën e luftës, marrëveshjen e grurit të Detit të Zi dhe marrëdhëniet dypalëshe, tha Presidenca turke.

Lexo po ashtu Kundërshtoi haptazi pushtimin e Ukrainës, historiani rus bëhet "viktima e radhës e Putinit" - bie në sy arsyetimi për shkarkimin e tij

Rusia u tërhoq nga marrëveshja e grurit në korrik, duke thënë se ajo ishte injoruar pasi kishte kërkuar kushte më të mira për eksportet e saj të ushqimit dhe plehrave.

Dhe Turqia, e cila fillimisht ndihmoi në ndërmjetësimin e marrëveshjes së bashku me OKB-në, është përpjekur të bindë Rusinë që t’i kthehet nismës.

Por Rusia ka thënë se nuk është e interesuar ta “ringjallë” atë. /Telegrafi/