Pacolli merr pjesë në Samitin e Ballkanit Perëndimor, shpalos aktivitetet e deritanishme nën procesin e Berlinit

Zëvendëskryeministri i Parë dhe Ministri i Punëve të Jashtme i Republikës së Kosovës, Behgjet Pacolli, po qëndron për vizitë zyrtare në Poloni.

Sipas njoftimit për media ministri Pacolli po merr pjesë në samitin e Ballkanit Perëndimor që po zhvillohet në qytetin perëndimor polak të Poznań, ku do të shpalosë aktivitetet e deritanishme nën procesin e Berlinit dhe do të përqendrohet në planet për të ardhmen.

“Në takimet tre-ditore të Samitit të Ballkanit Perëndimor po marrin pjesë gjashtë vendet e Ballkanit Perëndimor që morën pjesë në procesin e para-anëtarësimit në Berlin. Rreth 1,500 vetë pritet të marrin pjesë në samit, duke përfshirë më shumë se 1000 mysafirë. Samiti të ndiqet nga 14 kryeministra. Mes atyre që do të mbërrijnë në Poznan janë kancelarja gjermane dhe kryeministri britanikë dhe francezë. Ata pritet të diskutojnë çështjet më të rëndësishme për rajonin e Ballkanit Perëndimor”, thuhet në njoftim.

Ndër të tjera në njoftim thuhet se procesi i Berlinit është një iniciativë ndërqeveritare e udhëhequr nga Gjermania për të nxitur zgjerimin e Bashkimit Evropian në Ballkanin Perëndimor (Shqipëria, Bosnja dhe Hercegovina, Mali i Zi, Kosova, Maqedonia e Veriut dhe Serbia) dhe për të forcuar bashkëpunimin rajonal. Iniciativa përfshin tetë vende të BE-së, gjegjësisht Gjermaninë, Francën, Italinë, Austrinë, Slloveninë, Kroacinë dhe Britaninë e Madhe. Polonia u bashkua me projektin vitin e kaluar dhe ka marrë përsipër presidencën e saj në janar./Telegrafi/