Osmani: Bashkëpunimi me SHBA-të, i domosdoshëm që kufiri ynë të jetë i sigurt

Presidentja e Kosovës, Vjosa Osmani pas takimit me emisarin amerikan Gabriel Escobar, ka deklaruar se bashkëpunimi me aleatët, konkretisht me SHBA-të, duhet të jetë bosht i veprime që merr Kosova.

“Sapo përfunduam një takim përmbajtjesor me emisarin e SHBA-së, diskutuam për zhvillimet e fundit si dhe për proceset e rëndësishme që po kalon Kosova. SHBA-ja përgjatë çdo sfide kanë qëndruar përkrah Kosovës. Bashkëpunimi me aleatët, veçanërisht me SHBA-në, duhet të jetë bosht i veprimeve tona”, ka thënë Osmani.

Presidentja ka theksuar se grupi paramilitar serb që mori pjesë në sulmin në Banjskë më 24 shtator duhet të përballet me drejtësinë në Kosovë.

“Duhet të ketë përgjegjësi për këtë akt agresioni dhe sulm terrorist. Serbia duhet ti ekstradojë të gjithë ata që ishin të përfshirë në këtë sulm. Ne do të vazhdojmë ti zbatojmë standardet më të larta për një gjykim të drejtë dhe do të vazhdojmë të punojmë krah përkrah me aleatët e në veçanti me SHBA-të që kufiri ynë të jetë i sigurt dhe të parandalojmë sulme të tilla në të ardhmen”, u shpreh Osmani.

Sa i përket dialogut, Osmani shtoi se suksesi i këtij procesi varet nga qasja parimore dhe e barabartë e BE –së ndaj palëve.

“Është kurciale të ketë zbatim të plotë të marrëveshjeve të dakoruduara vitin e kaluar veçanërisht ajo e Ohrit. Angazhimi i SHBA-së në këtë drejtim mbetet kyç për një përmbyllje të suksesshme të dialogut që do të çojë në njohje të ndërsjellë, siç edhe është thënë në letrën e presidentit Biden”, ka deklaruar Osmani.

Presidentja shtoi se në bashkëpunim me aleatët, edhe çështja e dinarit do të rregullohet. /Telegrafi/