Orlando e Krasniqi diskutojnë për strategjitë e zgjerimit të tregtisë Itali-Kosovë

Ministri i Tregtisë dhe Industrisë, Vesel Krasniqi, priti sot ambasadorin e Republikës së Italisë në Kosovë, Nicola Orlando, ku diskutuan për thellimin e bashkëpunimit ekonomik dhe vazhdimin e mbështetjes së Italisë për Kosovën.

“Krasniqi e falënderoi ambasadorin Orlando për ndihmën e Italisë ndaj Kosovës që nga përfundimi i luftës, duke veçuar mbështetjen në ndërtimin e institucioneve të Republikës së Kosovës. Ministri e njoftoi ambasadorin për projektet e Ministrisë së Tregtisë dhe Industrisë, dhe për Ligjin për Investime Strategjike që krijon shumë lehtësira për investitorët potencial që do të investojnë në Kosovë”, thuhet në njoftimin për media.

Po ashtu në takim u diskutua edhe mundësia e rritjes së shkëmbimeve tregtare Kosovë-Itali, sidomos në produktet bujqësore.

Ndërsa ambasadori Orlando tha se pret nga Qeveria të punojë shumë në rritjen e transparencës, forcimin e ligjit dhe luftimin e korrupsionit.

Ai po ashtu theksoi se Italia do të vazhdojë mbështetjen për Kosovën, duke konfirmuar interesimin për shkëmbime tregtare dhe investime në mes të Kosovës dhe Italisë. /Telegrafi/