Zëdhënësi i Doganës së Kosovës, Adriatik Stavileci ka thënë se një vit pas vendosjes së tarifës, importet nga Serbia kanë rënë në 99% ndërsa nga Bosnja 97%.

Stavileci në “Dossier D” në RTV Dukagjini ka thënë se boshllëkun e lënë nga produktet serbe janë zëvendësuar nga mallrat e vendeve kryesisht të BE-së por edhe nga vendet fqinje si Shqipëria dhe Maqedonia.

Ai ka thënë se Serbia ka prodhuar edhe një numër të madh të brendeve ndërkombëtare, të cilët tashmë kanë filluar eksportet drejt Kosovës nga shtetet tjera pasi thotë se ato kanë fabrika edhe në vende tjera.

Stavileci ka thënë se është pritur një rënie e të hyrave pas tarifës por ka ndodhur e kundërta.

Ai thotë se mallrat ndërkombëtare kanë çmime më të larta dhe si pasojë edhe taksat që duhet të paguajnë janë më të larta.

Zëdhënësi i Doganave të Kosovës thotë se pas taksës eksportet e Kosovës nga 25 milion kanë rënë në 12 milion euro.

“Është lajm interesantë që për herë të parë, Kosova ka bilanc pozitiv tregtar në raport me Serbinë. Ata kanë eksportua në Kosovë mallra 3.3 milionë euro ndërsa ne kemi eksportua në Serbi rreth 12 milionë euro”.

Stavileci duke folur për punën e Doganës së Kosovës, ka thënë se është lajm pozitiv që ajo ka rritje të vazhdueshme të hyrave nga viti në vit./Telegrafi/