Një stuhi e fortë dimri ktheu qytetin amerikan në ‘zonë lufte’

Një stuhi e fortë dimri që ka përfshirë Amerikën e Veriut ka bërë qytetin e Buffalo, Nju Jork, të duket si një zonë lufte, ka vlerësuar guvernatorja e shtetit.

Kjo pasi që, sipas mediave të huaja, përcjell Telegrafi, të hënën qyteti regjistroi 25 vdekje të lidhura me motin, nga 13 të dielën.

“Kjo është një luftë me nënën natyrë dhe ajo na ka goditur me gjithçka që ka”, që nga e enjtja, tha Guvernatorja e shtetit të Nju Jorkut, Kathy Hochul.

Siç raportojnë mediat, kushtet e stuhisë po shtrihen nga Kanadaja deri në jug deri në Rio Grande, duke vrarë të paktën 50 njerëz në mbarë vendin.

Dhe rajoni rreth Buffalo, në veri të Nju Jorkut, është prekur më keq.

Ajo tha se banorët po përballeshin me një “situatë kërcënuese për jetën”, pasi shumë automjete të urgjencës nuk ishin në gjendje të arrinin në zonat më të goditura ose u mbërthyen në borë.

Madje një familje me fëmijë të vegjël – të moshës 2 deri në 6 vjeç – duhej të priste 11 orë përpara se të shpëtohej në orët e para të ditës së Krishtlindjes.

“Unë në thelb isha thjesht i pashpresë”, ka rrëfyer babai, Zila Santiago, për CBS News.

Ai tha se kishte arritur të qëndronte ngrohtë duke mbajtur motorin e makinës në punë dhe duke mbajtur larg shqetësimin duke luajtur me fëmijët.

Ndërkohë ekziston frika se viktima të tjera pritet të zbulohen pasi reshjet e borës të shkrihen dhe të zbulohen automjetet e bllokuara dhe të lejohet hyrja në shtëpitë e largëta.

Parashikuesit thonë se moti do të “zbutet” në ditët në vijim, por këshilla mbetet për të shmangur udhëtimet nëse nuk është thelbësore.

Gjatë fundjavës rreth 250,000 shtëpi dhe biznese përjetuan ndërprerje të energjisë elektrike – megjithëse energjia është rivendosur në mënyrë të qëndrueshme.

Veç kësaj, vdekje të lidhura me stuhinë u raportuan gjithashtu në Vermont, Ohio, Missouri, Wisconsin, Kansas dhe Kolorado.

Shteti perëndimor amerikan i Montana ishte më i godituri nga i ftohti, me temperatura që ranë në -50F (-45C).

Në anën tjetër, në Kanada, provincat e Ontarios dhe Quebec po mbajnë peshën kryesore të stuhisë. /Telegrafi/