Nëntë persona lirohen nga karantina, 168 të tjerë po qëndrojnë në Qendrën e Studentëve

Nëntë persona janë liruar sot nga karantina në Qendrën e Studentëve në Prishtinë, meqë të njëjtit nga analizat që u janë bërë mbrëmë ka dalë që nuk janë të infektuar me Covid-19. Ndërsa numri i personave që aktualisht po qëndrojnë të karantinuar në këtë qendër është 168.

Këtë e ka konfirmuar drejtori i Qendrës së Studentëve, Fatmir Sfisha.

“Nëntë persona janë liruar sot, të gjithë kanë dalë negativë që janë testuar dje, dhe 168 është numri momental i personave që po qëndrojnë në karantinë në Qendrën e Studentëve”, tha Sfishta për KosovaPress.

Aktualisht numri i personave të infektuar me Covid-19 në Kosovë është 780, ku 22 kanë vdekur dhe 201 janë shëruar.

Republika e Kosovës ka hyrë në javën e shtatë të përballjes me koronavirus, që prej 13 marsit kur u regjistruan rastet e para.

Qeveria e Kosovës ka pezulluar mësimin në shkolla, punën në restorante, ka mbyllur qendrat tregtare e lokale të tjera, si masë mbrojtëse ndaj Covid-19.

Ndërkohë me vendim të Ministrisë së Shëndetësisë, prej 15 prillit qytetarët mund të dalin nga shtëpitë e tyre vetëm për 90 minuta në ditë, duke respektuar numrin e parafundit të letërnjoftimit i cili i përcakton orën për qarkullim.