Mexhide Demolli-Nimani, drejtoreshë Ekzekutive e organizatës FOL, e cila funksionon në kuadër të “Demokracia në Veprim”, ka thënë se në zgjedhjet e 6 tetorit do të jenë 2 mijë e 500 vëzhgues, të cilët do të njoftojnë për çdo parregullsi.

Në një intervistë për Telegrafin, ajo ka thënë së për këtë janë duke u përgatitur edhe financiarisht.

“DNV është duke u përgatitur në këtë aspekt financiarisht. Do të jenë mbi 2 mijë e 500 vëzhgues nëpër terren, kemi edhe vëzhgues afatgjatë që e monitorojnë fushatën zgjedhore. Numri  i tyre është shumë i madh, jemi në përgatitjet finale, besoj që do të kemi mundësitë financiare që gjithçka të realizohet sipas planit të paraparë”.

Ajo tha se përveç që do të monitorojnë fushatën zgjedhore, do të ndihmojnë edhe votuesit.

“DnV do të jetë në të gjitha qendrat e votimit, do të ketë edhe ekipe mobile të cilat do të jenë në të gjithë territorin e Kosovës. Aty ku mund të kemi ndonjë parregullsi ku na lajmërojnë vëzhguesit nga terreni, do të ketë edhe call center në Prishtinë, ku do të jenë mbi 100 vullnetarë ku do të pranojnë dhe do të kontaktojnë me gjithë vëzhguesit në terren.

DnV përveç monitorimit të zgjedhjeve dhe të fushatës do të monitorojë edhe edukimin e votuesve që e bën KQZ, por të njëjtën kohë do të mundohet t’i nxit votuesit të dalin në zgjedhje, do të kemi një lloj edukimi të votuesve, qofshin votues të ri, por do të japim edhe më shumë informata qytetarëve që ta dinë saktë se ku kanë për të votuar ditën e zgjedhjeve me 6 tetor”, tha ajo.

Drejtoresha ekzekutive e Lëvizjes FOL, Mexhide Demolli-Nimani gjatë intervistës për Telegrafin

Demolli-Nimoni nga pozita e saj si drejtoreshë e Lëvizjes FOL, tha se janë duke menduar të rikthejnë debatin (Fol hapur) me kandidatët për kryeministër.

“Sapo t’i kemi kandidatët zyrtarë besoj se do të fillojmë me organizimin e Fol hapur – shpresojmë dhe jemi duke planifikuar që të kemi një audiencë prej studentëve, të cilët do të kenë mundësi që brengat e tyre t’i shprehin direkt tek kandidatët të cilët janë për kryeministër”, ka thënë ajo.

Në fund, ajo ftoi partitë politikë që të jenë korrekt në garë, të respektojnë rregullat dhe ligjin për zgjedhje. Po ashtu ajo bëri thirrje tek qytetarët që të shfrytëzojnë të drejtën e tyre për votim. /Telegrafi/