Në vitin 2022 Kosova eksportoi dyfish më shumë mallra në SHBA sesa importoi – top 10 produktet

Ekonomia e Kosovës ka një nivel të ulët të prodhimit dhe konkurrueshmërisë, çka e bën atë shumë të varur nga mallrat e importit. Por vitin e fundit eksporti i produkteve cilësore kosovare drejt Shteteve të Bashkuara të Amerikës ka shënuar rritje të konsiderueshme.

SHBA është ndër të paktat vende me të cilat Kosova ka bilanc tregtar pozitiv (më shumë shet mallra se që blenë).

Kësaj rritje të eksportit i ka kontribuar statusi preferencial tregtar, që Kosova gëzon me Shtetet e Bashkuara të Amerikës, status ky që i lejon dërgimin e mallrave të liruara nga detyrimet doganore, me qëllim të promovimit të rritjes ekonomike për shtetet në zhvillim.

Janë rreth 3,500 produkte nga sektorë të ndryshëm, që Kosova mund t’i eksportojë në ekonominë më të madhe të botës, pa pasur nevojë të paguaj taksa.

Sipas të dhënave të Doganës së Kosovës gjatë vitit 2022, kompanitë prodhuese kanë eksportuar rreth 117 milionë euro mallra në shtete të ndryshme amerikane.

Pjesa dominuese e eksporteve drejt SHBA-së gjatë vitit 2022 ishin dyshekët, jorganët dhe jastëkët.

Edhe fustanet për gra dhe vajza zënë një hapësirë të konsiderueshme të eksporteve nga Kosova në SHBA me rreth 8 milionë euro.

Kosova nga Shtetet e Bashkuara importoi kryesisht derivate të naftës, pasuar nga medikamente mjekësore.

Nga partnerët kryesorë politikë e ushtarakë, Kosova importoi edhe kofshë pule në sasi të konsiderueshme (mbi 6 milionë euro).

Kosova gjatë vitit 2022 eksportoi mallra në SHBA në vlerë 131 milionë euro

1 – Dyshekë, jorganë, jastëkë – 117 milionë euro

2- Fustane për gra e vajza – 7.8 milionë

3 – Mobilie druri – 1.7 milionë

4- Ushqime për kafshe – 850 mije euro

5-Materiale ndërtimi prej plastike – 340 mijë euro

6- Kafe e pjekur – 183 mijë euro

7-Bluza për gra dhe vajza – 178 mijë euro

8-Verë e kuqe dhe bardhë – 160 mijë

9-Kërpudha të ndryshme – 145 mijë euro

10-Pije freskuese – 73 mijë euro

Kosova importoi nga SHBA 70 milionë euro mallra

1- Koks nafte – 11.8 milionë euro

2- Medikamente dhe instrumente mjekësore – 9 milionë euro

3- Kofshë pule të ngrira – 6.1 milionë euro

4 – Autovetura – 4.3 milionë euro

5- Vaksina – 3 milionë euro

6- Revolverë dhe pistoleta – 2 milionë euro

7- Përgatitje ushqimore me yndyrë qumështi – 1.7 milionë euro

8-Polietilen – 1.6 milionë euro

9- Mallra të përzier – 1.3 milionë euro

10- Gaz propan – 1.2 milionë euro

Kujtojmë, Shtetet e Bashkuara të Amerikës janë të parët në listë sa i përket vendeve ku Kosova eksporton mallra.

Mbi 15% e eksporteve të përgjithshme të Kosovës shkojnë në Amerikë./Telegrafi/