Në tri ditët e fundit, më shumë se 30 aeroplanë ushtarakë amerikanë fluturuan mbi Evropë

Një analizë e Sky News e të dhënave të gjurmimit të fluturimit tregon se më shumë se 30 aeroplanë ushtarakë amerikanë kanë qenë aktivë mbi pjesë të Evropës dhe Detit Mesdhe gjatë tri ditëve të fundit.

Këto përfshijnë aeroplanë të përdorur për zbulim, furnizim ajror me karburant dhe transportim mallrash, përcjell Telegrafi.

Aty gjithashtu përfshihen 12 aeroplanë F-35 që udhëtuan nga Mbretëria e Bashkuar në rajon të martën.

Imazhet e marra nga fotografi Glenn Lockett në Suffolk tregojnë “tre furnizues” amerikanë që shoqërojnë nga katër aeroplanë luftarakë F-35 secili.

Të dhënat e gjurmimit të fluturimit tregojnë se “furnizuesit” udhëtuan drejt Mesdheut dhe më pas u kthyen në Mbretërinë e Bashkuar.

Shumica e aeroplanëve ushtarakë amerikanë të gjurmuar rregullisht i fikin vendndodhjet dhe destinacionet e tyre përfundimtare, sipas të dhënave nga Flightradar24.

Disa nga aeroplanët u zhvendosën nga SHBA-ja në Evropë, ndërsa të tjerë duket se u afruan më shumë me Lindjen e Mesme.

Të paktën pesë nga aeroplanët ushtarakë amerikanë u ulën në Aeroportin e Chanias në ishullin grek të Kretës.

Në imazhin më poshtë, një Boeing KC-46A Pegasus i përdorur kryesisht për furnizim me karburant nga ajri shihet duke u gjurmuar në Mesdheun lindor. /Telegrafi/