Në TikTok shqiptarët ftohen për t’i dëmtuar monumentet serbe, kërkohet kujdes

Dy ditë pas sulmit terrorist në kanalin e Ibër Lepencit, përmes TikTokut një faqe që mbanë emrin Kingdom of Dardania ose Mbretëria e Dardanisë, i ka ftuar shqiptarët që të hakmerren ndaj dy monumenteve serbe, njëri në qendër të Kosovës e tjetri në veri.

Thirrja për dhunë dhe hakmarrje e ka marr vëmendjen e shumë përdoruesve të TikTok-ut.

Thirrja për targetin e parë ka marr 100 mijë shikime, 334 komente dhe mbi 2600 pëlqime. Targeti i saj është shtatorja e Milosh Obiliqit këtu në qendër të Graçanicës. Shumë prej komentuesve të lajthitur nga ky person ose nga kjo faqe, prapa së cilës nuk duhet se kush qëndron, shprehin gatishmëri që t’i bashkohen thirrjes për hakmarrje.

Monument ose objekt tjetër ndaj të cilit ftohen qytetarët për hakmarrje është edhe shtatorja e princit Lazar në hyrje të sheshit në Mitrovicën Veriore.

Ish-hetuesi policor gjatë trazirave të marsit 2004 këto thirrje i cilëson të rrezikshme, dhe bënë thirrje për kujdes.

Murat Mehmeti, mendon se thirrjet për dhunë mund të kenë dy qëllime, përfitimin politik ose ndonjë interes të një shteti në prapavijë, në këtë rast Serbia.

“Zakonisht grupet e interesit, grupet politike kriminale, për me ardh në pushtet ose për kthimin e favoreve që kanë pasur më herët manipulojnë me masën….ata kanë për dëshirë nuk iu konvenon stabliteti i vendit, edhe Serbia për derisa jemi në këto raporte me ta ata kanë gjithherë interes që të shfrytëzojnë qoftë personat jo-rezident që të shkaktojnë pakënaqësi sociale, shprehje mllefi demonstrimi ose akte, vandalizmit.”, ka theksuar për RTV Dukagjinin Murat Mehmeti – ish-hetues policor.

Mediumi ka kërkuar informacione nga Policia e Kosovës nëse janë duke e analizuar këtë thirrje dhe nëse kanë ndërmarrë ndonjë veprim, por deri në publikimin e kësaj kronike nuk janë përgjigjur.

Kjo faqe e hapur në TikTok thirrjen për dhunë e ka kamufluar kinse për t’u hakmarrë për një lapidar në Preshevë me emrat e 27 dëshmorëve të rënë të UÇPMB-së, i cili në vitin 2013 ishte hequr nga policia dhe ushtria serbe.

Thirrje për kujdes bëjnë edhe hulumtues nga organizatat për rregullimin e përmbajtjes së informacionit në hapësirën digjital.

“Në TikTok zakonisht është e pakotrollueshme se kush hapë faqe se kush publikon, janë të gjithë të lirë me publiku, prandaj TikToku nuk është një platformë mirëfilli me u informu audienca, edhe duhet me e pasë parasysh që këto me i marr me kujdes, përmbajtjet e ndryshme që publikohen në TikTok se nuk dihet se kush qëndron prapa tyre.”, ka deklaruar Festim Rizanaj – Hultumtues në Hibrid.

Rizanaj thotë se duhet mobilizim në mes të audiencës, institucioneve dhe mediave që të raportohen këto faqe dhe tw parandalohet nxitja e incidenteve ndëretnike, sidomos për faktin se TikToku ka një shkallë të lartë të përdorimit.

Faqja që ka 640 mijë pëlqime, postimin e parë e ka në gusht të 2023-s me përmbajtje të një seriali humoristik, pastaj i ka intensifikuar postimet një ditë pas sulmit terrorist në Bansjkë, duke e kombinuar përmbajtjen me politikë, me FSK, Polici e madje edhe me UÇK-në.