Policia e Kosovës ka bërë të ditur se gjatë realizimit të detyrave dhe autorizimeve të saj në funksion të garantimit të rendit dhe sigurisë së përgjithshme, si dhe parandalimin e veprave penale, me datë 18.02.2019, rreth orës 01:30, në rajonin e Prizrenit/Dragash, ka identifikuar dhe ndaluar një veturë me targa vendore.

Me këtë rast, siç thuhet në një njoftim të Policisë, pas një procesi të verifikimit dhe kontrollit në bashkëpunim me zyrtarë të drejtorisë së antitrafikimit me njerëz, janë arrestuar dy persona nën dyshimin për “trafikim me njerëz”, si dhe janë identifikuar tri viktima të trafikimit (të gjitha femra/shqiptare/kosovare).

“Të personat e dyshuar janë intervistuar dhe me vendim të prokurorit kompetent ndalohen për 48 orë”, thuhet në njoftimin e Policisë.

Po sipas njoftimit, viktimat janë dërguar për ekzaminim mjekësor dhe janë ndërmarrë veprimet për strehimin e tyre, sipas procedurave të parapara për raste të tilla. /Telegrafi/