Ndryshimet kushtetuese presin epilogun e takimit Kovaçevski – Mickoski

Qeveria në mbledhjen e sotme nuk e shqyrtoi propozim-nismën e Ministrisë së Drejtësisë për ndryshime Kushtetute. Ideja e organit ekzekutiv është që gjërat të qartësohen më mirë nga takimi i liderëve të mërkurën. Dikasteri Drejtësisë propozimin bashkë me raportin e grupit të punës e ka dorëzuar në Qeveri një ditë më parë, por jo zyrtarisht mësohet se të premten kur Qeveria do të mbajë mbledhjen e ardhshme, Kuvendit do t’i jepet dritë jeshile për fillimin e procedurës.

Zëvendëskryeministri për Çështje Evropiane, Bojan Mariçiq thotë se në rast dështimi të nismës, do të ketë pasoja.

“Derisa nuk i bëjmë ndryshimet kushtetuese, do të humbasim shansin. Ka një bindje tek një pjesë e opozitës se nuk është me rëndësi kur bëhen ndryshimet dhe mund të ndodhin edhe pas 3 ose 4 viteve. Mendoj se kjo është humbje kohe të cilën nuk mund ta kthejmë dhe neve do të na kushton pritje edhe 10 vite të tjera”, tha Bojan Mariçiq, Zëvendëskryeministër për Çështje Evropiane.

Ndryshimet e propozuara i referohen Preambulës ku pas popullit boshnjak shtohen edhe fjalët “populli bullgar, kroat, malazez, slloven, populli hebre dhe egjiptian”. Të njëjtat fjalë shtohen edhe në Nenin 49 ku dispozitat kushtetuese i referohen diasporës. Kryeministri Dimitar Kovaçevski propozimin do ta shpalos para liderit të opozitës maqedonase, Hristijan Mickoski të mërkurën gjatë takimit kokë më kokë.

Dy liderët e bllokut politik maqedonas shkojnë me qëndrime të prera në takim: Kovaçevski me bindjen se duhet të ketë ndryshime kushtetuese dhe ato duhet t’i mbështes opozita, ndërsa Mickoski shkon me idenë për të biseduar se çfarë do të ndodhë pas dështimit të nismës për ndryshime, duke qenë i sigurt në deputetët e tij se nuk do t’i mbështesin të njëjtat. Në rast se procedura e ndryshimeve kushtetuese fillon javën që vjen, në shtator parashikohet hapja e nevojës për ndryshime kushtetuese./Alsat/