Naftëtarët mblidhen të martën, diskutojnë për udhëzimin e Qeverisën për çmimet e naftës

Naftëtarët pritet të mbajnë mbledhje këtë të martë, për të shqyrtuar Udhëzimin Administrativ të publikuar një ditë më parë nga Qeveria e Kosovës lidhur me rregullimin e çmimeve të naftës.

Kështu ka bërë të ditur për Telegrafin, kryetari i Shoqatës së Naftëtarëve të Kosovës, Fadil Berjani, pasi është pyetur për të komentuar këtë vendim të ekzekutivit.

“Ende nuk kemi mbajtur takim si shoqatë e naftëtarëve për të paraqitur qëndrimin karshi Udhëzimit Administrativ të Qeverisë për caktimin e marzhës shitëse të derivateve. Takimi do të mbahet të martën”, deklaroi Berjani.

Lexo po ashtu Qeveria merr vendim që të përcaktohet çmimi maksimal i lejuar i derivateve

Siç njoftoi Qeveria të premten, Udhëzimi Administrativ në fjalë zbatohet vetëm ndaj karburanteve të përdorshme në transport.

Në nenin 4 të këtij Udhëzimi, thuhet se mund të rregullohen çmimet duke caktuar marzhën tregtare maksimale të lejuar: dy eurocentë për litër të produktit të shitur me shumicë dhe dymbëdhjetë eurocentë për litër të produktit të shitur me pakicë.

Lexo po ashtu Publikohet Udhëzimi Administrativ për rregullimin e çmimeve të naftës

Rritja e çmimeve të naftës dhe benzinës në Kosovë ka shënuar nivelin më të lartë në 20 vjetët e fundit, sipas Shoqatës së Naftëtarëve.

Ministrja e Industrisë, Ndërmarrësisë dhe Tregtisë, Rozeta Hajdari tha se Udhëzimi Administrativ do t’i mbrojë konsumatorët e konkurrencën dhe do të mënjanojë çrregullimet e çmimeve në treg.