Mrekulli në Filipine, 6-vjeçari i mbijeton më të keqes – pavarësisht që u godit në kokë nga një plumb qorr

Adrian Lecter Paskua, 6-vjeç, mrekullisht ka arritur të shërohet pavarësisht që është goditur nga një plumb qorr në kokë, – e policia është vënë pas personit që ka shtënë me armë.

Gjatë natës se 1 gushtit, vogëlushi ishte në shtëpi më të ëmën dhe në momentin kritik po pinte ujë në kuzhinë kur krejt në mënyrë të befasishme u rrëzua në tokë – pasi që një plumb u shkrep nga kulmi i shtëpisë së fqinjit në provincën Batangas në Filipine, transmeton Telegrafi.

E ëma e tij Anabel mendoi që Adrian ka humbur baraspeshimin dhe është rrëzuar, siç i kishte ndodhur shumë herë më parë. Iu afrua për ta parë se çfarë i kishte ndodhur dhe mbeti e shokuar kur vërejti se po i rridhte gjak.

Për të mos humbur më shumë kohë, e dërgoi me urgjencë në spital ku vogëlushi i është nënshtruar kontrolleve të detajuara. Në rëntgen u konstatua qartë se kishte një plumb në kokë.

Mjekët mbetën të shokuar sikurse edhe prindërit e tij. E duke pasur parasysh që intervenimi kirurgjik nuk mund të kryhej menjëherë, atë e kishin vënë në komë, derisa prindërit mblodhën paratë e kërkuara për operacionin e komplikuar – nxjerrjes së plumbi nga koka e Adrianit.

“Djaloshi im është shumë i fuqishëm. Nuk ka qarë aspak, pavarësisht plagës që e kishte në kokë. Ishim në sallon kur u shkrep plumbi. Askush nuk e dinte se nga erdhi. Personave të papërgjegjshëm nuk duhet dhënë arma në dorë. Shpresoj që policia do ta zbulojë”, ka thënë halla e tij Michelle.

Operacioni është kryer më 6 gusht dhe ka përfunduar me sukses, kurse vogëlushit do t’i duhet të qëndrojë në spital edhe për disa javë. Mjekët duan të binden që plaga nuk ia ka dëmtuar trurin dhe të mos ketë ndonjë pasojë.

Familjarët e djaloshit e kanë raportuar rastin, dhe tani kanë filluar hetimet që do të duhej të zbulonin se kush e shkrepi plumbi që për fat të mirë nuk ishte fatal për vogëlushin. /Telegrafi/