LAJMI I FUNDIT:

Ministri Lekaj flet me kryetarët e komunave për Autostradën e Dukagjinit

Ministri Lekaj flet me kryetarët e komunave për Autostradën e Dukagjinit

Ministri i infrastrukturës, Pal Lekaj, priti në takim kryetarët dhe përfaqësuesit e komunave nëpër të cilat do të kalojë Autostrada e Dukagjinit dhe i njoftoi me variantet e prezantuara nga kompania si dhe variantin e përzgjedhur nga kompania si më i favorshmi për realizim.

Ministri Lekaj, u kërkoi atyre që të paraqesin sugjerimet dhe komentet e tyre, në mënyrë që ky projekt të realizohet në harmoni me vullnetin dhe nevojat e qytetarëve të vendit.

Kompania projektuese e Autostradës së Dukagjinit, ua prezantoi në mënyrë të detajuar kryetarëve dhe përfaqësuesve të komunave të tri variantet e propozuara, duke i njoftuar ata edhe me variantin e përzgjedhur nga ta si kompani projektuese, e i cili sipas tyre është më i realizueshmi si për nga kostoja financiare, ashtu edhe për nga ndikimi ambiental e socio-ekonomik.

Kryetarët dhe përfaqësuesit i dhanë vlerësimet e tyre fillestare, vlerësime këto që do të detajohen gjatë debateve publike që do të mbahen nëpër të gjitha komunat që prekën nga autostrada, në mënyrë që t’i hapet udhë edhe projektimit final të kësaj autostrade. /Telegrafi/