Ministri Aliu thotë se linjat hekurudhore të Kosovës do të lidhen me vendet e rajonit

Ministri i Mjedisit, Planifikimit Hapësinor dhe Infrastrukturës, Liburn Aliu ka thënë se linjat hekurudhore të Kosovës do të lidhen me vendet e rajonit dhe ato evropiane.

Aliu duke folur për projektin e linjës Fushë Kosovë-Mitrovicë, ka thënë se kjo do të vazhdoj deri në Leshak.

“Është projekti i parë që ka të bëjë me rehabilitimin dhe modernizimin e linjave hekurudhore. Kjo për vendin përbën një kalim të rëndësishëm në ndikim në transport. Projekti është në fazën e përfundimit dhe pritet të përcillet me projektin nga Fushë Kosova në Mitrovicë, e më pastaj nga Mitrovica në Leshak”, tha Aliu gjatë një konference për medie, përcjell Telegrafi.

Ai theksoi se pas studimit të fizibilitetit të hekurudhës Prishtinë-Durrës, kjo linjë do të bëhet e rëndësishme për shpërndarjen e mallrave.

“Këto projekte janë të rëndësishme për vendin tonë, si për qarkullim të brendshëm, por rëndësi të veçantë ka fakti që përmes këtyre Kosova do të mund të kyçet me vendet e rajonit dhe panevropiane. Përmes kësaj linje do të lidhemi me Shkupin, rrjedhimisht me Portin e Selanikut”, theksoi ai.

“Pas marrëveshjes që kemi bërë me Shqipërinë për studimin e fizibilitetit për linjën hekurudhore nga Prishtina për në Durrës, ku Porti i Durrësit pritet të zhvillohet në një vend i rëndësishëm për shpërndarjen e mallrave”, ka përfunduar Aliu. /Telegrafi/