Mbahet panairi ‘Gjithëpërfshirja në punësim’ për personat me aftësi të kufizuara – bizneset prezantojnë pozita të ndryshme të punës

Në organizimin e Save the Children Kosova dhe me partneritet me Forumin Kosovar të Aftësisë së Kufizuar e Odën Ekonomike të Kosovës (OEK), është mbajtur panairi i punës për personat me aftësi të kufizuara “Gjithëpërfshirja në punësim”.

Në këtë panair, 30 kompani kanë prezantuar vendet e lira të tyre të punës, e veçanërisht për këtë kategori të shoqërisë kosovare, me qëllim që këta të fundit të prezantojnë aftësitë dhe njohuritë, në bashkëbisedim me punëdhënësit potencial.

Mynavere Behluli nga Save the Children Kosova tha se ky panair do t’iu shërbej këtyre personave, me qëllim që t’i shohin mundësitë për tregun e punës.

“Deri më tani, pjesëmarrja ka qenë veçanërisht e mirë dhe ne do të jemi këtu gjatë ditës dhe jemi mobilizuar të gjithë që personat me aftësi të kufizuara nga e gjithë Kosova. Ky panair do të shërbej për personat me aftësi të kufizuara, ata t’i shohin mundësitë që ofron tregu i punës nga kompanitë që i kemi sot të pranishme dhe të njëjtën kohë kompanitë të shikojnë talentet dhe potencialet dhe interesimet për vendet e punës”, tha Behluli.

Sipas saj, ideja e panairit është që të filloj komunikimi i biznesit dhe personave me aftësi të kufizuara.

“Ideja është që të filloj komunikimi në mes të biznesit dhe personave me aftësi të kufizuara dhe të vazhdojë. Pra, ne presim interesimin e tyre dhe të shohin ofertat e kompanive”, shtoi ajo.

Për Dionis Ferataj ardhja në këtë panair është një mundësi për punësim.

“Unë kam ardhur të shikoj për punësim, me qëllim që ta shikoj vetën më lartë”, shprehet Ferataj.

Ndërsa, Ilire Sardulli thotë se si persona të tillë, duhet të aftësohen më shumë.

“Më pëlqen që të vij ta gjej një punë për punësim edhe që të shikoj vende pune. Duhet të aftësohemi sa më shumë”, thekson Sardulli.

Mirsad Hajdarin nga KFC thotë se kanë pasur disa kërkesa për vende punë nga organizata që merren me personat me aftësi të kufizuar.

“Sot në panairin e punës kemi ekspozuar vendet e punës që kemi për restorante, si kuzhinier, përgatitës të hamburgerëve, për shembull te pjesa me klientë ku kemi të bëjmë me bashkëbisedim me klientët, marrjen e porosive, pozita e paketuesit dhe përshpejtuesit”, tha Hajdari.

“Kemi pasur disa kërkesa nga organizatat dhe kompanive me këto gjëra, si trajnimi dhe trajtimi i tyre në aspekt profesional gjë që është shumë e mirë”, shtoi ai.

Në këtë panair, ka marr pjesë edhe Telegrafi Jobs si një platformë që ofron dhe prezanton pozitat e punës.

Brezar Xërxa nga Telegrafi Jobs pohon se në këtë panair kanë ardhur me qëllimin që t’iu krijohet hapësira këtyre personave.

“Ne këtu kemi ardhur për ta prezantuar Telegrafi Jobs te punëkërkuesit si dhe te bizneset, për t’i informuar më shumë rreth pozitave që janë të hapura dhe për të prezantuar versionin e ri, të cilët e kemi lansuar me pagesë, e që po ka shumë sukses dhe po dëshirojmë që të jemi më afër punëkërkuesit e punëdhënësit”, pohon Xërxa.

“Pasi që ky panair ka të bëjë me personat me aftësi të kufizuar, ne kemi dashur që t’iu krijojmë hapësirën këtyre, e që të janë pjesë e Telegrafi Jobs, e të informohen më shumë rreth konkurseve që ata mund të janë të interesuar që të aplikojnë”, përfundon ai.

Të dhënat e fundit të publikuara nga Banka Botërore, shfaqin nivelin e ulët të punësimit të të rinjve dhe të rriturve me aftësi të kufizuara, duke theksuar posaçërisht sfidat me të cilat përballen gratë dhe personat të cilët jetojnë në zona rurale.

Po ashtu, të dhënat tregojnë se vetëm 15 për qind e personave me aftësi të kufizuara në Kosovë të moshës 15-65 vjeç janë të punësuar. /Telegrafi/